Texturas Internacionais nº 3
A acción exterior de Galicia en América Latina |
| Conclusións |
|
Xulio Ríos e María Xosé Viqueira |
|
De todo o exposto anteriormente cabe deducir o seguinte: • A acción exterior constitúe para a Comunidade Autónoma de Galicia un ámbito irrenunciable da súa acción pública, que gañou nos últimos anos un considerable peso específico e mellorou a súa vertebración orgánica. Pese a isto, subsiste aínda certa fragmentación interna susceptible de mellora, que contribuiría a dotar de maior eficacia ó conxunto das actuacións que se proxectan cara ó exterior. • América Latina, e moi especialmente a alianza Mercosur, constitúe un ámbito preferente das actuacións exteriores de Galicia. Os progresos advertidos nas relacións económicas bilaterais, aínda sen ser de todo satisfactorios pola súa connotación deficitaria, evidencian a utilidade do impulso exterior. Se ben nin todo é mérito nin todo é responsabilidade da Administración, é indubidable que a colectividade empresarial puido atopar nela o amparo institucional necesario para desenvolve-los seus proxectos de internacionalización, sempre difíciles e complexos nun marco como o galego que carece dun número elevado de grandes empresas e se conduce xeralmente de forma conservadora nas súas ofensivas ó exterior. • Xunto ó económico, o factor cultural e emigrante, ó igual que a promoción da imaxe dunha Galicia desenvolvida, na vangarda das experiencias integradoras europeas, son as constantes dun discurso de aproximación a América Latina que se beneficiou do pulo e a continuidade dun mesmo proxecto político no goberno autónomo, pero que configurou aínda escasas infraestructuras para transcender un omnipresente factor persoal. • Con independencia de contradiccións puntuais que nunca revestiron a magnitude dun conflicto político, a lealdade, a colaboración e o entendemento, favorecidos pola ausencia dun compromiso nacionalista similar ó existente noutras nacionalidades históricas, caracterizan as relacións da Xunta de Galicia e o goberno central. • A numerosa comunidade emigrante constitúe unha referencia ineludible para valora-la proxección de Galicia en América Latina. Ata agora, sen embargo, fracasaron, na súa maioría, os intentos de converte-lo factor migratorio nun organizado elemento dinamizador das relacións económicas bilaterais. Nisto influíu tanto o contido preferente das actuacións desenvolvidas polos centros galegos no exterior, moi centrados no cultural e asistencial, a ausencia de estratexias perseverantes que atendan á súa formulación como hipotéticos grupos de influencia, e o elevado e crecente peso da súa significación política-electoral. Por outra banda, a reivindicación da galeguidade entre os colectivos emigrados obedece prioritariamente á lexitima aspiración de verse beneficiados polas melloras sociais impulsadas dende o goberno autónomo, no que ocupa un lugar secundario o maior compromiso cos intereses de Galicia nos países que residen. • As cifras que indican o nivel de atención de Galicia cá cooperación ó desenvolvemento son lamentables. Máis aínda, tendo en conta o xeneroso esforzo rexistrado en boa parte dos países da rexión que acolleron os nosos emigrantes en épocas nas que o subdesenvolvemento e a ausencia de liberdades impedían o noso acceso o benestar. • Galicia aspira a desenvolver un importante papel na conformación da Comunidade Iberoamericana de Nacións e a vertebra-las súas relacións con Europa, pero a pesar de contar con algúns factores favorables, a debilidade da súa proxección económica na rexión, hipoteca seriamente as súas expectativas políticas. |
|
|
|
ÚLTIMA REVISIÓN: 04/04/2002
|
