Observatorio Galego da Lusofonía (Ogalus)

Ogalus, perspectiva internacional Por Ângelo Gonçalves Vicente (Vieiros, 11/05/2006)

O Ogalus, pois, está no camiño de ser un axente dinamizador e dinámico, ao servizo do país, para traballar no aproveitamento da vantaxe estratéxica que a lingua do noso país supón, para dotarse de ferramentas especializadas na Lusofonía. (Na foto, de esquerda a dereita, Miguel Barros, Ângelo Gonçalves e Camilo Nogueira).   Temos oportunidades na Lusofonía? A esta pregunta respondían no primeiro acto público organizado polo Observatorio Galego da Lusofonía (Ogalus), os relatores Miguel Barros e Camilo Nogueira. Nunha mesa redonda, no salón da Casa Galega da Cultura, perante un nutrido grupo de persoas que puideron escoitar como os dous veteranos políticos defendían a utilidade da ferramenta da lingua galega fóra das fronteiras do noso país, nos territorios de expresión portuguesa ou, mellor definida, do xeito como os dous relatores subliñaban nas súas intervencións: “galego-portuguesa”. O Ogalus, que botaba a andar a finais do pasado 2005 como aposta do Instituto Galego de Análise e Documentación Internacional, principia así a desenvolver unha das súas funcións esenciais: a concienciación da sociedade e das institucións galegas en relación ao potencial da súa lingua para promover todo tipo de intercambios (culturais, económicos, políticos, sociais...) cos países e rexións de lingua galego-portuguesa que representan, na actualidade, máis de 223 millóns de persoas en 4 continentes e preto do 2% do PIB mundial. Cifras que, en todo o caso, están a aumentar de maneira exponencial de ano para ano. O Ogalus, pois, quere ser un axente dinamizador e dinámico, ao servizo do país, para traballar no aproveitamento da vantaxe estratéxica que a lingua do noso país supón, para dotarse de ferramentas especializadas na Lusofonía como unha Biblioteca, un Centro de Documentación, unha Hemeroteca que actualmente xa supera as 1.200 noticias e que é renovada diariamente, unha rede de contactos que multipliquen o capital relacional do país ou o Ogalus.info, un servizo informativo gratuíto froito dunha selección semanal de noticias aparecidas nos principais medios de comunicación de todas ás áreas xeográficas da Lusofonía, esparexidas por diversos continentes.

Ângelo Gonçalves Vicente, coordinador do Observatorio Galego da Lusofonía e analista do Igadi.

Instituto Galego de Análise e Documentación Internacional www.igadi.org ÚLTIMA REVISIÓN: 11/05/2006 Fernando Pol