|
Creado en 1991, o Instituto Galego de Análise e Documentación
Internacional (IGADI) é unha entidade independente e sen fins de lucro que ten por obxecto principal a investigación
dos problemas internacionais e a activación de estratexias que favorezan unha maior proxección de
Galicia no mundo en tódolos dominios.
Documentación e investigación
O IGADI recibe e analiza a prensa de numerosos países;
arquiva obras, xornais, revistas e outros soportes documentais (anuarios estatísticos, teses, actas de coloquios,
conferencias, etc) referidos á situación económica, social e política de cada país,
rexional e mundial. Estes materiais constitúen a base para a creación do Centro de Información e Documentación Internacional Contemporánea. Asimesmo o IGADI promove a realización de investigacións
sobre as máis diversas problemáticas de orde internacional.
Á disposición da sociedade
Ambolos dous servicios concretan un programa de apoio ás
colectividades de diferentes niveis educativos, ás empresas e outros axentes sociais, que se complementa
coa activa divulgación de información ós medios de comunicación, movementos asociativos,
parlamentarios, personalidades e institucións galegas.
Apoio e mediación
O IGADI ofrece un servicio de apoio e mediación para
empresas e institucións que inclúe os seguintes aspectos particulares: realización de estudios
sectoriais, de monografías, acompañamento de delegacións, traducción e interpretación,
investimento e comercio exterior. Este servicio forma parte dun proxecto máis amplo que contempla a creación
en Galicia dun Observatorio
Exterior económico e sociopolítico.
Actividades públicas
Para difundir información e promover debates na opinión
pública, o IGADI organiza
seminarios, mesas redondas e conferencias. En permanente
contacto con todo tipo de medios e institucións, facilita a presencia de membros do IGADI nos medios de comunicación, practicando unha política de intervención inmediata en
cuestións de actualidade. Igualmente programa a realización de cursos de formación.
Relacións con outros centros e institucións
O IGADI mantén relacións de cooperación
e de intercambio con outros centros de investigación estatais e internacionais. Ademais é signatario
de convenios de colaboración con Universidades e con Administracións de diferentes niveis.
Financiamento
O IGADI financiase coas aportacións dos seus membros
e colaboradores; coa remuneración dalgunhas das súas actividades e co apoio prestado polas Administracións
Públicas, entidades financeiras e organizacións sociais.
Informacións adicionais
O IGADI está dirixido por Xulio Ríos.
O seu domicilio (provisional) é o seguinte: Avenida Joselín, 7. Portal 3-4ºB. 36300-Baiona (Pontevedra).
Tel/Fax: 986 357238. e-mail: info@igadi.org.
O IGADI dispón do CIF G36741049. Está rexistrado
no Censo de Asociacións e Entidades Culturais de Galicia (Dirección Xeral de Cultura): B-02-63/PO-403
libro 1 folio 151 expte. 1808. Igualmente está incluido no Rexistro de Organizacións non gobernamentais
para o desenvolvemento (Dirección Xeral de Relacións Institucionais): SGPA 96/13-ONGD-44. E no rexistro
estatal de asociacións do Ministerio do Interior: número 105.600.
Organigrama (álbum de fotos)
Dez anos para coller impulso
O Instituto Galego de Análise e Documentación
Internacional (IGADI) nace en 1991 como un proxecto inspirado para comprender o mundo desde aquí e proxectar
a Galicia no contexto internacional. Dez anos despois é unha realidade asentada, un instrumento vivo e dinámico,
que ofrece a oportunidade de implicarse no seguimento da realidade internacional e na vertebración dos intereses
estratéxicos de Galicia no exterior:
• O IGADI dispón dun Centro
de Información e Documentación Internacional Contemporánea
que recibe e clasifica máis dun cento de publicacións especializadas nos diversos conflictos e áreas
xeográficas. Este Centro elabora trimestralmente un Boletín de Sumarios
e mantén unha base de datos sobre as transformacións no mundo chinés. Asi mesmo acolle os
principais Anuarios estratéxicos.
• Conta cunha hemeroteca na que dende 1989 e diariamente é obxecto de clasificación
a información xerada dende os medios de prensa arredor de conflictos e crises internacionais, con especial
atención á evolución política, socioeconómica e en materia de defensa e relacións
exteriores, de Occidente, países de Europa Central e Oriental, Rusia e países ex-soviéticos,
Cuba e o conxunto de América Latina, China, Xapón e outras zonas xeográficas. Os principais
conflictos e crises internacionais son obxecto dun tratamento especial.
• Impulsa reflexións arredor da acción
exterior de Galicia, habilitando unha Lista en internet
(Galicia
Exterior) para debater abertamente sobre tan decisiva
cuestión. Igualmente acomete a realización das Guías de Recursos (de acción exterior,
do Arco
Atlántico), auténticos inventarios para
unha acción comprometida coa inserción de Galicia no mundo.
• Intercambia información sobre o diagnóstico e prospección exterior coa Xunta de Galicia,
a través da Secretaría Xeral de Relacións coa Unión Europea e Acción Exterior,
no marco dun convenio estable de colaboración.
• Dispón dun amplo abano de publicacións propias,
entre as que cómpre sinalar a revista semestral de análise e estudios internacionais, Tempo exterior,
e a colección Texturas
internacionais.
• Coordina e exerce a secretaría do Fondo Galego de Cooperación e Solidariedade,
unha asociación do municipalismo galego que pretende a homologación e pleno desenvolvemento das políticas
de solidariedade internacional.
• Promove a recuperación de figuras históricas como Plácido Castro,
participando activamente na creación da Fundación que leva o seu nome e organizando cada ano unha
Conferencia Anual.
• Multiplica o seu labor de intervención social en diferentes medios: prensa escrita, radio, televisión,
publicacións especializadas, etc, tanto de Galicia, como de España e outros países. Cada semana
elabora o Canal Mundo, un semanario dixital de análise internacional, editado en colaboración con
Vieiros (http://www.vieiros.com).
• Xunto con outros centros, participa en numerosos encontros de debate e reflexión sobre cuestións
de actualidade e interese internacional. Desenvolve, ademáis, fondas relacións de intercambio e colaboración
con múltiples entidades similares de todo o mundo.
• Organiza actividades
propias: seminarios, conferencias, mesas redondas e
outras, co obxecto de incrementar a sensibilización da sociedade galega arredor da importancia e transcendencia
do feito internacional.
• Dispón dunha páxina web, http://www.igadi.org, permanentemente actualizada e que constitúe
unha auténtica fiestra para contemplar e entender o mundo desde Galicia.
• Integrado por Luis Alvarez Pousa, Víctor Fernández Freixanes, Xosé Fortes Bouzán,
Jesús García Rojo, Ramón Máiz Suárez, Antonio Martínez Puñal,
Xulián Maure Rivas, Manuel Mera Sánchez, Alejandro Molins de la Fuente, Fernando Pérez-Barreiro
Nolla, Xosé Lois Rodríguez Pardo, e Lois Tobío Fernández, conta cun Consello Asesor
no que milita a pluralidade e o compromiso cunha Galicia de seu e universalista.
• Conta cun equipo
básico de traballo e de analistas que observan
e interpretan dende unha óptica galega as principais transformacións do mundo contemporáneo.
Igualmente conta cunha rede ampla de colaboradores en varios lugares do planeta.
• Estreita a colaboración co mundo universitario, especialmente mediante a realización de prácticas
que se recoñecen como créditos nos curricula dos alumnos (Facultade de Ciencias Políticas
da USC) e a oferta dunha formación complementaria e rigurosa.
• Realiza proxectos de investigación que brindan a oportunidade de afondar en problemas de especial transcendencia
para Galicia. Habitualmente en colaboración con outros axentes, Universidades ou centros semellantes de
calquera parte do mundo, tamén executa proxectos propios.
• Reforza a súa colaboración con todas as institucións, estreitando os seus vinculos e relacións
de cooperación con múltiples entidades, a fin de promover unha maior comprensión e sinerxia
da sociedade galega a respecto dos asuntos internacionais.
• Insiste na creación dun Foro Iberoamericano, atendendo á necesidade de crear espacios xenuinos
para a reflexión e o intercambio a todos os niveis entre as comunidades ibérica e americana, e apostando
polo fomento do mutuo coñecemento, a cooperación e a solidariedade.
• Inicia a súa andaina na xestión de programas comunitarios, especialmente no ámbito local,
a fin de favorecer a súa implicación en estratexias de inserción internacional que posibiliten
ese intercambio de experiencias que mellore a cualidade das políticas públicas.
• Dende o firme compromiso co noso idioma, promove a traducción ó galego dos principais intrumentos internacionais.
En 2001 recibiu o Premio da Fundación “Lois Peña Novo” pola creación e difusión en lingua galega da información
internacional.
Dende o IGADI queremos expresar o noso agradecemento a todas as institucións que apoiaron o desenvolvemento
das nosas actividades, e aos numerosos colaboradores que nos acompañaron nestes dez anos. Sen os uns e sen
os outros, non sería posible a consolidación do IGADI como unha institución de prestixio,
independente, plural, e útil á nosa sociedade.
|
Igadi na Rede
