| Fondo Galego |
 |
 |
|
|
|
| fondogalego.org info@igadi.org |
|
| Tel/Fax: 986 357 238 |
  Número
99 - outubro 2007 |
|
Especial 10 anos
O primeiro aniversario do Fondo Galego de Cooperación e Solidariedade coincidía co lanzamento do Infórmate a Fondo, no que dábamos conta do que por entón considerabamos un éxito: o Fondo chegaba ao 10% de representatividade no conxunto das entidades locais e ao 33% da poboación. Despois dun ano de camiño, o Fondo acollía a 28 concellos, fronte aos 10 membros que o constituíran un ano antes. A día de hoxe, somos 96 os membros, entre os que se inclúen 93 concellos e 3 deputacións provinciais. Isto é, o Fondo Galego representa a máis do 68% da poboación total de Galicia.
Estes dez anos do Fondo Galego non serían posibles sen todas aquelas persoas e institucións que aportaron o seu traballo para facernos medrar. Van para todos e todas o noso agradecemento e os nosos parabéns.
Ao longo destes dez anos, o Fondo Galego tivo a oportunidade de coñecer in situ moitos dos lugares onde estamos a prestar a nosa axuda. Os campamentos de refuxiados saharauís no deserto alxeriano, o arquipélago de Cabo Verde, a cidade de Santiago de Cuba, Guatemala ou a Provincia Sur de Sri Lanka, onde estamos a colaborar co programa ART Gold de Nacións Unidas, foron algúns dos lugares aos que tivemos ocasión de desprazarnos co propósito de avaliar de preto a efectividade dos proxectos financiados e intercambiar ideas cos nosos parceiros para mellorar a calidade da nosa cooperación.
A primeira convocatoria de pro-xectos do Fondo Galego serviu para financiar tres proxectos de cooperación ao desenvolvemento. No 2001, xa eran 8 os proxectos financiados polo Fondo, 12 no 2004 e 15 no 2006. Tamén o perfil xeográfico se ampliou e na actualidade o Fondo Galego está presente en América do Sur, América Central e o Caribe, Asia e África, cunha aposta decidida polas comunidades de expresión lusófona.
A Confederación de Fondos,
que reúne aos nove Fondos que actúan en todo o Estado, xuntouse por primeira vez en Galicia en febreiro
de 1998, para impulsar, coa súa presenza, o noso nacemento. Fixemos novamente de anfitrións no 2002,
en Vigo, e no 2006, cando nos xuntamos en Pontevedra para falar das liñas de actuación que estamos
a seguir no noso día a día.
O Fondo de Emerxencia En xaneiro de 2002, a Asemblea Xeral acordou a creación dun fondo que recollese as axudas extraordinarias dos entes locais e provinciais galegos para facer fronte a situacións de emerxencia e aberto a todo tipo de doazóns, sexan públicas ou privadas. A asistencia á colectividade galega en Arxentina na crise de 2001, a reconstrución de áreas baixo control da Autoridade Palestina trala ocupación israelí no 2002, a colaboración en América Central e México tralo paso do furacán Stan, así como no norte de Marrocos despois do terremoto de 2004, a axuda ás vítimas do Tsunami en Asia en 2005, a axuda alimentaria ao Sahara no 2006 ou ás vítimas do terremoto do 2007 no Perú, foron algunhas das aplicacións que lle demos ao noso Fondo de Emerxencias.
En xaneiro de 2001 vía a luz o libro Palabras con Fondo, manifestación do valor que o Fondo outorga á palabra no avance da cooperación descentralizada. Participaron na iniciativa 23 autores de tódolos xéneros literarios, e distribuíuse en colaboración coa Federación de Libreiros de Galicia. Tamén nese ano promovemos o proxecto Ondas Solidarias, un espazo radiofónico sobre cooperación ao desenvolvemento que se emitiu durante sete meses na rede de emisoras municipais. Antón Cortizas, gañador do Premio Xerais de literatura infantil e comprometido co desenvolvemento internacional, foi o primeiro en ceder ao Fondo Galego os dereitos de autor dunha das súas obras. Os cartos obtidos pola venda de Memorias dun río van ser destinados a un proxecto educativo en América Latina.
Segundo datos da Coordinadora de ONGD-España, en 1991 os fondos procedentes da cooperación descentralizada representaban o 10% dos fondos totais das ONGD integradas na Coordinadora (6,76 millóns de euros). En 1999, sumaban 106,95 millóns (24%) e en 2003 alcanzaban a cifra de 160,57 millóns (o 31% dos fondos totais), e o 55% dos fondos públicos captados. Un incremento en 12 anos do 2.300%. Do monto da cooperación descentralizada reseñado, 58,56 millóns de euros, o 36%, proviña de Concellos e Deputacións.
Baiona acollía en xaneiro de 2004 a primeira xuntanza da Rede Municipalista Solidaria. Estruturada en sete áreas xeográficas, a Rede alberga ás e aos representantes dos Concellos pertencentes ao Fondo Galego co obxectivo de dinamizar a nosa oferta de sensibilización e afondar na aposta solidaria municipal. Despois de Baiona viñeron Pontevedra, A Pobra do Caramiñal,
Culleredo, Fene, Lugo, Ourense, Ferrol, A Coruña, Santiago, Caldas, Noia, Carballo e moitas outras vilas
que contan co Fondo para organizar e asentar a idea da solidariedade entre os seus cidadáns.
Son numerosas as persoas que apoiaron, coa súa visita
e entusiasmo, o traballo do Fondo Galego. Henry Ruíz, presidente da Fundación Augusto Sandino de
Nicaragua, estivo aquí en 1999. A súa compatriota Gladys Cáceres, directora do Instituto de
Promoción Humana (INPRHU-Somoto), fíxoo en varias ocasións, e tamén estiveron persoeiros
como o ministro de Xustiza da Fronte Polisario, Hammada Selma; Omar López Rodríguez, arquitecto conservador
da cidade de Santiago de Cuba; Claudia Rodrigues e Talina Pereira, representantes do Instituto da Condiçao
Feminina de Cabo Verde; Juan Alberto Castillo, técnico municipal de Honduras; Clarice Aparecida dos Santos,
coordenadora de educación do Movemento dos Traballadores Rurais sen Terra (MST) brasileiro; o coordinador
do programa de Nacións Unidas ART-Tsunami Sri Lanka, Gianluca Vignola; o frade dominico basileiro Frei Betto,
ex asesor do presidente de Brasil Lula da Silva e pai do Programa Fome Zero; o uruguaio Roberto Bissio, director
do Instituto del Tercer Mundo; a nicaraguana Ana María Pizarro, membro da comisión directiva da rede
de Saúde de Mulleres Latino Americanas e do Caribe; ou a directora do Centro de Estudos das Mulleres da
Universidade de Bharathidasan (India), N. Manimekalai.
A formación é un dos puntos claves do funcionamento
do Fondo Galego de Cooperación e Solidariedade. Entre as primeiras xornadas sobre a cooperación celebradas
a comezos do ano 2000, e as IV Xornadas Anuais de Cooperación que terán lugar en Compostela o vindeiro
novembro, hai ducias de cursos, seminarios e talleres nos que o Fondo Galego estivo presente co obxectivo claro
de difundir entre a cidadanía as nosas ideas e propostas de solidariedade e cooperación.
“Solidariedade? a Fondo!” foi a primeira das exposicións que empregamos para divulgar a nosa misión e fomentar a implementación de políticas de cooperación e loita contra a pobreza. O fotógrafo Xosé Abad prestounos unhas fermosas imaxes que, acompañadas de palabras de Margarita Ledo, María Xosé Queizán e Teresa Barro, falan do “Eterno Feminino”. Durante todo o 2004, a exposición arredor de “Os obxectivos do Milenio 2000-2015” achegou á cidadanía os compromisos asinados no 2000 polos líderes mundiais baixo o auspicio de Nacións Unidas. Para axudar á súa difusión, Isaac Díaz Pardo redactou para nós un manifesto de apoio a estes Obxectivos, que promoven a instauración de políticas económicas e sociais que contribúan á redución da pobreza e a un mellor desenvolvemento humano. Con grandes doses de humor e retranca, 28 autores de 16 países elaboraron a exposición “A Paz, cuestión de Fondo” que analiza os aspectos máis inxustos da sociedade. A pobreza, o racismo e a violencia foron obxecto de análise nesta exposición que percorre Galicia desde 2005 e aínda segue facendo camiño. E co décimo aniversario chega unha nova exposición, “Dez Anos con Proxectos”, que circulará por vilas e deputacións galegas dando a coñecer como foi esta primeira década do Fondo Galego. Outras iniciativas, como o concurso “Por un mundo + xusto, faite solidario”, achegaron ata os institutos de Galicia a loita por un mundo mellor.
Co apoio da Rede Municipalista Solidaria xurdiu a idea de crear unha actividade de vacacións solidarias dirixida aos membros dos Concellos do Fondo Galego. Así nacía en 2005 o programa Vacacións con Traballo, destinado ao persoal técnico da Administración local galega e que conta cunha excelente acollida. Vacacións con Traballo busca “globalizar” o poder local a través do intercambio de experiencias entre profesionais de Galicia e das Comunidades do Sur, e contribuír ao intercambio formativo e á mellora da capacitación técnica dos e das especialistas dos países do Sur. Na primeira edición, os e as seleccionados/as tiveron como destinos Nicaragua e Cabo Verde, aos que neste 2007 se lles engade Perú.
Mapa de socios do Fondo
Galego |
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
  Descarga
o boletín en formato pdf. |
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
www.fondogalego.org ÚLTIMA REVISIÓN: 28/09/2007
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
