| Fondo Galego |
 |
 |
|
|
|
| fondogalego.org info@igadi.org |
|
| Tel/Fax: 986 357 238 |
  Número
97 - abril-maio 2007 |
|
As eleccións municipais do mes de maio preséntansenos como un punto de inflexión no devir do Fondo Galego. Chégase ao final da lexislatura e, con ela, péchase tamén o Plano Estratéxico 2003-2007 que viña marcando as liñas de traballo ata o momento. Os obxectivos marcados supuñan un salto cualitativo importante para a nosa consolidación do Fondo como referente da cooperación municipalista en Galicia, e, cinco anos despois, moitas son as cousas conseguidas, pero moitas tamén as que quedan por diante. Así se recolle nunha Declaración expresa aprobada pola Comisión Executiva o pasado 27 de abril. É o momento de pechar unha etapa, de reflexionar sobre os resultados e os desafíos, e de renovar os enfoques; pero tamén é o momento de situarse no novo ciclo que comeza, para darlle o impulso de saída que precisa, asentar ben os seus piares, e reiniciar o camiño. Somos case un cento de Concellos (máis tres Deputacións), agrupamos a un 70% da poboación galega e, polo tanto, a fase que se abre agora no 2007, xa non é, prioritariamente, de crecemento, senón de consolidación dos compromisos e achegas. As eleccións marcarán a renovación e/ou continuidade d@s nos@s representantes polític@s. Serán os protagonistas do novo ciclo e marcarán os próximos rumbos. Cada vez máis solidarios e comprometidos.
N. Manimekalai, directora do Centro de Estudos das Mulleres da Universidade de Bharathidasan (Tiruchy-A India), visitou a Secretaría do Fondo Galego para expor a súa experiencia en materia de xénero e desenvolvemento e avalar o traballo que a ONGD galega Implicadas/os no Desenvolvemento xestiona no seu país. N. Manimekalai percorreu, durante o mes de abril, varias cidades galegas difundindo a importancia do enfoque de xénero aplicado ás políticas de desenvolvemento.
• Na procura de profesionais da solidariedade No mes de abril, o Fondo Galego puxo de novo en marcha o programa de Vacacións con Traballo, dirixido ao persoal técnico dos Concellos e Deputacións socias. A medio camiño entre a cooperación propiamente dita e a sensibilización, Vacacións con Traballo propón aos técnicos e técnicas municipais que se incorporen durante un mes nos proxectos que desenvolven os nosos parceiros do Sur. O intercambio de experiencias, a aprendizaxe mutua, o achegamento de realidades, a colaboración técnica, son algúns dos obxectivos deste programa que, por fin último, ambiciona reforzar as políticas de cooperación no eido local galego. E para iso debemos contar con máis persoas que coñezan de primeira man o que é a solidariedade, ou para que serve a cooperación, e que se convertan en auténticos axentes de sensibilización local. Este ano contamos con tres prazas e tres destinos: Nicaragua, Cabo Verde e Perú, coordinadas cos respectivos parceiros: INPRHU-Somoto, Asociación Nacional de Municipios Caboverdianos e Tierra de Niños. O prazo de inscrición remata o vindeiro 15 de maio. • Rede Municipalista Solidaria Nos meses de abril e maio, terán lugar as primeiras xuntanzas do ano da Rede Municipalista, que estarán acompañadas por obradoiros e testemuños solidarios. O eixe central dos encontros entre técnicas e técnicos dos Concellos socios será o plan de sensibilización deste exercicio e as actividades que xirarán entorno ao X Aniversario. A iniciativa conta, unha vez máis, co apoio da Dirección Xeral de Cooperación Exterior da Xunta de Galicia. Coma sempre, a participación activa de todas e todos é fundamental para dinamizar e dar continuidade ao noso traballo en rede. Para facelo e a salvo de cambios de última hora, aquí tedes o noso itinerario solidario:
• Vivendas contra o esquecemento A pesar da súa longa duración, o conflito palestino-israelí segue marcando a axenda da tensión no Oriente Próximo e condenando á exclusión e ao empobrecemento a todo un pobo: a Franxa de Gaza (un dos dous Territorios Ocupados chamados a constituír un futuro estado palestino) conta cun dos niveis de densidade de poboación e de empobrecemento máis elevados do mundo. O capítulo do dereito ao retorno da poboación expulsada das súas casas e terras durante a 1ª Guerra Árabe-Israelí de 1948 segue sendo unha asignatura pendente. A negativa de Israel convérteo nun dos principais escollos que ambas partes atopan nas sempre difíciles negociacións de paz. Mentres tanto, 4,3 millóns de persoas malviven nos campos de Gaza e Cisxordania, así como nos países árabes veciños, e son moitos máis os que conforman a diáspora palestina ao longo de todo o mundo. A Axencia de Nacións Unidas para os Refuxiados de Palestina no Oriente Próximo, UNRWA nas súas siglas en inglés, foi establecida no ano 1949 para paliar a situación da poboación refuxiada palestina, ante a perspectiva de falta de solución inmediata para este problema. Dende entón e ata hoxe, é a súa principal fonte de provisión de servizos básicos. O Fondo Galego e a a Consellería de Vivenda da Xunta de Galicia, asinaron o pasado 12 de abril un convenio de colaboración para pór en marcha un proxecto de rehabilitación de vivendas nos campos de refuxiados de Jalazone e Amari, ambos situados dentro dos Territorios Ocupados. Cun orzamento de 99.000 euros, o proxecto coordinado e executado pola UNRWA, servirá para mellorar as condicións de habitabilidade e hixiene de 16 familias. • Convocatoria de Proxectos O pasado 30 de marzo, pechouse a convocatoria de proxectos 2007, cunha cifra récord de proxectos presentados, tanto por parte de ONGs de aquí como do Sur. Son proxectos con variados destinos: Cabo Verde, Senegal, Nicaragua, Guatemala, Perú, Colombia, Brasil, Cuba, India, Territorios Palestinos, etc, e variados sectores de intervención, que están agora en fase de baremación, para que a nosa Comisión Técnica (composta por técnicas e técnicos municipais con coñecemento e experiencia en cooperación) poda propor o seu financiamento atendendo a criterios de calidade e relevancia, e tamén da súa adaptación aos recursos do Fondo Galego.
Ante a convocatoria das eleccións locais a celebrar o 27 de maio próximo, a Comisión Executiva do Fondo Galego de Cooperación e Solidariedade, entidade recoñecida pola FEGAMP como axencia municipalista para a cooperación internacional ao desenvolvemento, considera de interese formular as seguintes consideracións: 1. Nesta última lexislatura constatouse un avance importante do tecido solidario do municipalismo en Galicia. Así, o número de entidades asociadas no Fondo Galego medrou de forma exponencial ata sumar case un cento de Concellos e Deputacións, que representan arredor do setenta por cento da poboación da nosa Comunidade Autónoma. 2. Nesta última lexislatura constatouse un singular aumento da sensibilidade das corporacións locais e provinciais respecto á necesidade de contribuír con fondos propios á loita contra a pobreza e a prol da gobernación democrática nos países do Sur. A tal efecto, contribuíron de forma notable á difusión das iniciativas de sensibilización promovidas polo Fondo Galego que gozaron de ampla receptividade en moitas institucións locais e provinciais. 3. Nesta última lexislatura reforzouse a coincidencia de criterios entre as diferentes Administracións galegas a propósito da necesidade de configurar a cooperación como un eixe esencial da actuación pública, fortalecendo a transferencia de recursos, experiencias e capacidades do poder local galego para mellorar as condicións de vida en comunidades de áreas xeográficas concretas. 4. Nesta última lexislatura asentouse e avanzou a colaboración cos actores da cooperación e moi especialmente coas ONGDs actuantes en Galicia, firmes aliados neste proceso de afirmación do compromiso coa construción dun mundo máis humano e sostible. 5. Todas esas circunstancias sinalan un momento especialmente idóneo para que se produza un salto cualitativo no eido local, de xeito que esta Administración poida acompañar o esforzo que o conxunto da sociedade está a desenvolver, evitando quedarse atrás na plasmación dunha solidariedade efectiva e transformadora. 6. Como en anos anteriores, o Fondo Galego levou aos partidos políticos a mensaxe sobre a necesidade de contemplar este compromiso nos programas electorais cos que concorren aos comicios do 27 de maio. Sabido é que no Fondo Galego, configurado dende o seu inicio como un espazo de encontro, conviven todas as sensibilidades políticas presentes no municipalismo. 7. A solidariedade e a cooperación internacional ao desenvolvemento non pode estar por máis tempo ausente da axenda local coa dimensión requirida. É hora de apostar polo incremento dos recursos destinados á cooperación internacional e de preocuparse por levar adiante unha cooperación de calidade que contribúa de forma efectiva a mellorar as condicións de vida dos seus beneficiarios directos, pero que tamén facilite a complicidade e comprensión social entre nós mesmos. Como acontece no eido ambiental, as fronteiras da pobreza non existen e todos debemos comprometernos para contribuír á súa erradicación. Un mundo desigual é un mundo inestable do que ninguén pode evadirse. 8. O Fondo Galego, avaliando positivamente a lexislatura que agora remata e felicitando a todos aqueles que contribuíron á dinamización da cooperación na nosa Comunidade, URXE un pacto global para que a lexislatura 2007-2011 concrete en Galicia o tempo dunha cooperación alargada, dentro e fóra, que dignifique a nosa presenza neste eido.
José Ángel Cuerda José Ángel Cuerda, ex alcalde de Vitoria-Gasteiz, é todo un referente no ámbito do compromiso municipal coa cooperación. Durante o seu mandato, converteu o seu Concello nun exemplo do moito e ben que se pode facer dende o eido local polo desenvolvemento socio-económico dos países empobrecidos. Por iso quixemos entrevistalo, agradecendo a súa amabilidade e boa disposición. Fondo Galego: Por que os Concellos deben implicarse en asuntos globais como é a cooperación ao desenvolvemento? José Ángel Cuerda: As cidades e vilas son o espazo privilexiado da política, da implicación responsable dos cidadáns nos asuntos da súa comunidade, pero son tamén o espazo da globalización, da interdependencia mundial. O local e o global, a nosa cidade e o mundo enteiro, están intimamente relacionados, e desde este lugar concreto no que vivimos, debemos asumir a responsabilidade de cambiar o mundo. O noso desenvolvemento, o noso transgresor desenvolvemento, mediatiza e dificulta o benestar de grande parte da humanidade, e cómpre mudar a nosa forma de ser e de estar, de pensar e de actuar, para que todos, en todas partes, podan ter a esperanza tanxible dunha vida mellor. Os nosos concellos deben asumir a encomenda de cooperar ao desenvolvemento humano dos pobos máis desfavorecidos e de combater as desigualdades a escala local e mundial. Fondo Galego: Que especificidades debería ter a cooperación ao desenvolvemento impulsada desde as entidades locais? José Ángel Cuerda: A grande tarefa dos nosos gobernos locais debe ser a promoción da solidariedade, como virtude cívica esencial para avanzar cara a igualdade real e efectiva. Solidariedade co “outro”, con “todo outro”, solidariedade para unha xusta distribución de bens e afectos, solidariedade para cambiar as estruturas inxustas e non só para aliviar os síntomas, solidariedade para loitar contra toda discriminación, solidariedade en todos os ámbitos cidadáns. Fondo Galego: Ata o de agora, ten funcionado? Cales teñen sido as súas fortalezas e debilidades? José Ángel Cuerda: Aínda que se ten avanzado moito desde as entidades locais en cooperación, o camiño a percorrer non ten fin. É preciso superar o cansazo que provoca a impotencia para poder cambiar un mundo tan inxusto desde a nosa insignificancia. E tamén se debe evitar a tentación de abordar só os nosos problemas, os nosos numerosos e importantes problemas de aquí. Educar para a cooperación, educar para a solidariedade, é a grande e urxente tarefa que temos no noso mundo local. E nese afán teñen o seu posto privilexiado as familias, os centros escolares, as organizacións sociais, os medios de comunicación e os poderes públicos. O valor da proximidade temos que utilizalo para promover a solidariedade cos máis próximos, pero tamén con todos os pobos do mundo e coas futuras xeracións. Aos gobernos locais debe de corresponderlle a tarefa de promover e liderar o esforzo colectivo de cidadáns e organizacións, coordinando o seu traballo horizontal e verticalmente con outras institucións e cos propios destinatarios da súa cooperación solidaria.
23 de abril a 2 de maio: Misión do Fondo Galego en Cabo Verde. 26 de abril: V Xornadas de Sensibilización sobre a Interculturalidade, no Centro Froxel de Arteixo. Organizan Ecos do Sur e o Concello de Arteixo. 26 de abril: Rede Municipalista Solidaria en Tomiño. 27 de abril: Rede Municipalista Solidaria en Cuntis. 27 de abril: Comisión Executiva en Santiago. 3 de maio: Rede Municipalista Solidaria en Culleredo. 4 de maio: Rede Municipalista Solidaria en Mugardos. 7-8-9 de maio: Seminario “Compra Pública Ética: Un Modelo Social e Económico de Desenvolvemento e Consumo Sustentable”, na Facultade de Ciencias Políticas da USC. Organiza Amarante. 10 de maio: Rede Municipalista Solidaria en Ourense. 10 de maio: Encontro con AGADER sobre a cooperación en Ecuador. 11 de maio: Rede Municipalista Solidaria en Mondoñedo. 14-19 de maio: Curso sobre a metodoloxía ART de cooperación, en Sevilla. 27 de maio: Eleccións municipais.
|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
  Descarga
o boletín en formato pdf. |
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
www.fondogalego.org ÚLTIMA REVISIÓN: 07/05/2007
|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
