Fondo Galego fondogalego.org info@igadi.org Tel/Fax: 986 357 238

Documentación / Convenios Convenio de colaboración FEGAMP-Fondo Galego Acordo de colaboración entre a Federación Galega de Municipios e Provincias e o Fondo Galego de Cooperación e Solidariedade Reunidos en Santiago de Compostela, a 8 de xaneiro de 1998. Dunha banda, Julio Álvarez Núñez, presidente da Federación Galega de Municipios e Provincias, e doutra, Alfredo Novoa Gil, presidente do Fondo Galego de Cooperación e Solidariedade, MANIFESTAN Primeiro. Que a Federación Galega de Municipios e Provincias (FEGAMP) está interesada en contribuir, na medida das súas posibilidades, ó desenvolvemento de accións de cooperación e solidariedade internacional. Segundo. Que ambas partes constatan un aumento da vontade de cooperación dos Concellos e Deputacións de Galicia, como expresión institucional dunha maior conciencia e sensibilidade social respecto dos países menos favorecidos. Terceiro. Que o Fondo Galego de Cooperación e Solidariedade presente sumar esforzos das entidades locais da nosa Comunidade Autónoma para contribuir ó desenvolvemento de accións de cooperación e solidariedade que contribúan á erradicación da pobreza no mundo e a eliminación das desigualdades. Cuarto. Que a FEGAMP considera positivo e necesario complementar os esforzos que tradicionalmente veñen desenvolvendo algúns Concellos e Deputacións de Galicia vertebrando unha opción ampla, plural e democrática que posibilite a colaboración de todas as entidades locais galegas con independencia do seu tamaño e posibilidades orzamentarias. En consecuencia, ACORDAN: 1. A FEGAMP recomenda ós Concellos e Deputacións de Galicia a súa adhesión ó Fondo Galego de Cooperación e Solidariedade. 2. A FEGAMP, na medida das súas posibilidades e tal como xa fixo durante o proceso constituinte, brinda ó Fondo Galego todo o seu apoio, material e técnico, a esta iniciativa. 3. O Fondo Galego de Cooperación e Solidariedade informará puntualmente á FEGAMP dos seus acordos e actividades, establecendo unha liña de comunicación directa e fluida e comprométese a facilitar á FEGAMP o asesoramento necesario. 4. A FEGAMP e o Fondo Galego coordinaranse para desenvolver as iniciativas de cooperación e solidariedade internacional que poidan interesar ós municipios e provincias galegas e a ambas institucións. O PRESIDENTE DA FEGAMP O PRESIDENTE DO FONDO GALEGO Julio Alvarez Núñez Alfredo Novoa Gil   www.fondogalego.org ÚLTIMA REVISIÓN: 09/09/1998 Fernando Pol