Igadi na Rede / Fondo Galego de Cooperación e Solidariedade

Durante varias semanas, a poboación maubere de Timor-Leste foi víctima da represión máis brutal e indiscriminada. As milicias proindonesias, organizadas baixo a protección das tropas do xeneral Wiranto, camparon ás súas anchas destruíndo canto atopaban ó seu paso e asasinando e intimidando ós habitantes locais. O seu principal obxectivo consistía en impedir o libre exercicio do dereito de autodeterminación da illa, ocupada militarmente dende hai 25 anos. Indonesia, a potencia invasora, e Portugal, a potencia colonial e formalmente aínda administradora, pactaron, coa mediación de Nacións Unidas, un calendario para a resolución pacífica deste conflicto. Sen embargo, os feitos posteriores evidenciaron a dobre lingoaxe de Iacarta. Pese á súa tardanza, a intervención internacional baixo mandato de Nacións Unidas permite abrigar esperanzas de restauración da normalidade. Neste contexto, o Fondo Galego:

Expresa a súa máis rotunda condena daqueles actos de violencia que tratan de impedir a libre expresión democrática dos dereitos individuais e colectivos do pobo de Timor-Leste e urxe a retirada inmediata do seu territorio de todas as tropas indonesias.
Require a fin da indiferencia dalgúns sectores da comunidade internacional e demanda unha implicación activa, cando menos similar á advertida en supostos similares, para garantir a efectiva implementación do dereito de autodeterminación.
Reclama a investigación dos crimes cometidos polas milicias proindonesias, a detención dos culpables e o seu procesamento e condena.
Felicita ó pobo de Timor-Leste pola súa dignidade e valentía e reclama a plena culminación do calendario establecido por Nacións Unidas.
Invita a todos os Concellos e entidades locais de Galicia a explicitar a súa solidariedade activa co pobo de Timor-Leste, contribuíndo de maneira xenerosa ó actual proceso de reconstrucción.