|
Os representantes das organizacións sindicais da función pública local
que se citan a seguir:
Central Sindical Independente e de Funcionarios, CSI-CSIF;
Comisións Obreiras de Galicia, FAP-CCOO;
Unión Xeral de Traballadores, UGT-FSP;
Confederación Intersindical Galega, CIG.
Convocados a instancias do Fondo Galego de Cooperación e Solidariedade,
MANIFESTAN:
1. Que participan da idea de fomentar, como liña de actuación propia das Corporacións Locais
e Provinciais de Galicia, a participación en proxectos e programas de cooperación, desenvolvemento
e solidariedade internacional, potenciando e asumindo este eixe de actuación como un espacio de encontro
para o colectivo de persoal ó servicio da Administración Pública.
2. Que comparten a visión da cooperación como un método e unha estratexia para vertebrar a
solidariedade cos pobos e sociedades máis desfavorecidas, comprometendo, impulsando e propiciando a creación
dun tecido solidario en cada poboación, de xeito que se abra camiño a unha orde económica
internacional máis xusta e se posibilite a erradicación daquelas trabas e
impedimentos que dificultan a eliminación da pobreza e das desigualdades.
3. Que consideran de primordial importancia que dende a Administración local se favoreza e estimule unha
maior sensibilización e comprensión arredor da necesidade de exercer unha rica e maior solidariedade
do Norte co Sur, con políticas xenerosas e abertas á participación plural dos diferentes e
múltiples axentes sociais, conscientes de que non soamente se trata con estas políticas de favorecer
un desenvolvemento sostible e integral nos países destinatarios de axuda, senón igualmente de incrementar
a conciencia social e crítica dos nosos cidadáns, de potenciar a recuperación dunha ética
firmemente asentada en valores humanistas, de convivencia pacífica,
tolerancia e igualdade entre todas as persoas.
4. Que sendo sabedores de que o Fondo Galego de Cooperación e Solidariedade nace como unha plataforma democrática,
plural, que comparte as premisas recollidas nos puntos anteriores e asumindo o compromiso de desenvolver accións
neste sentido, amosamos a nosa unánime disposición para contribuír, na medida das nosas posibilidades,
ó fortalecemento desta iniciativa, fomentando a participación na mesma do colectivo de traballadores
ao servicio das Administracións locais de Galicia.
En proba de conformidade, asinamos a presente declaración, en Santiago de Compostela, a 12 de decembro de
2000.
CSI-CSIF, UGT-FSP, CCOO-FAP, CIG.
|
