|
 |
| 30/04/2008 |
|
Téxtil
Inditex en Seúl
A empresa téxtil Inditex, propiedade de Amancio
Ortega, abriu dúas tendas en centros financeiros e comerciais da capital surcoreana Seúl, sumando
93 establecementos na rexión Asia-Pacífico, así como ampliando a súa presenza a 69
países. (Fonte: El Correo Gallego).
Galicia
Polémica política pola
viaxe a Cuba
O secretario xeral da consellería de Cultura,
Carlos Amoedo, acusou ao PPdG de “facer unha especie de yihad” polo custe da viaxe e da organización da
participación galega na Feira Internacional do libro de La Habana, celebrada en febreiro pasado. (Fonte: El Correo Gallego).
Galicia
Santiago no Arco Atlántico
A exposición itinerante “Cidades atlánticas,
portas da mundialización”, sobre as relacións de intercambio das urbes atlánticas desde o
século XV, foi presentada en Santiago polos representantes deste organismo, das cidades de Avilés,
Vigo, Limoges, Nantes, Burdeos, Xixón, Rennes, Lorient e Porto. Esta exposición percorrerá
Europa durante tres anos. (Fonte: La Voz
de Galicia).
Inmigración
Ordes con oficina de emigrantes
O concello coruñés de Ordes proporcionará
atención especializada a emigrantes retornados e inmigrantes a través dunha oficina de información
e asesoramento permanente xestionada pola ONG “Ecos do Sur”.
(Fonte: La Voz de Galicia).
|
| 29/04/2008 |
|
Unión Europea-Marítima
Analizan o combate á piratería
A petición española, os ministros de Asuntos
Exteriores da UE manterán un debate sobre o combate contra a piratería no Océano Índico
e o Golfo de Guinea, trala crise causada polo secuestro do atuneiro “Praia de Bakío”. Pola súa banda,
o deputado do BNG, Bieito Lobeira, lembrou no Parlamento galego que o seu movemento pedira en outubro de 2007 maiores
medidas oficiais para afrontar a seguridade dos caladoiros no Océano Índico. (Fonte: El Correo Gallego).
Galicia
Voluntarios para a ONU
O programa do Voluntariado Universitario de Nacións
Unidas ante os Obxectivos do Milenio presentou as solicitudes para 45 prazas aos estudantes da USC, para participar
en proxectos de cooperación ao desenvolvemento en Burkina Faso, Sri Lanka, Tailandia, Ruanda, Kyrguztan,
Indonesia, India, Nepal, Vietnam, Bolivia, Brasil, República Dominicana, Ecuador, Exipto, Guatemala, Honduras
e Perú. O prazo está limitado ata o 13 de maio.
(Fonte: La Voz de Galicia).
|
| 28/04/2008 |
|
Galicia
Expulsado militante pro-israelí
Pedro Gómez-Valadés foi finalmente expulsado
da militancia do BNG por dirixir a Asociación Galega de Amizade con Israel (AGAI), tras unha decisión
adoptada pola maioría dos membros do consello comarcal do BNG de Vigo. Gómez-Valadés, quen
asistiu á asemblea sen coñecer que ía a votarse a súa expulsión, declarou que
esta decisión probablemente viña precedida pola negativa nacionalista a votar unha resolución
de condena do holocausto xudeu. Pola súa banda, a AGAI cualificou de “fascista” a expulsión de Gómez
Valadés. (Fonte: La Voz de Galicia).
Galicia
Satisfacción por apoio ao patrimonio
inmaterial
O colectivo galego “Ponte nas Ondas” valorou moi positivamente
o interese mostrado polo director xeral da UNESCO, o xaponés Koichiro Matsuura, polo patrimonio inmaterial
galego-portugués, durante a súa reunión co presidente da Xunta, Emilio Pérez Touriño.
O colectivo subliñou que este apoio garante a receptividade para que Galicia presente propostas e “abre
as posibilidades de inscribir en 2009 o patrimonio común galego-portugués na primeira Lista Representativa
do Patrimonio Inmaterial Mundial”. (Fonte:
vieiros.com).
China
Compostela Monumental en Xangai
A Asociación de comerciantes e empresarios da
zoa histórica de Santiago, agrupados en “Compostela Monumental” anunciou a súa participación
na Feira Internacional Expo 2010 de Xangai.
(Fonte: El Correo Gallego).
Marítima
Protección contra a piratería
A conselleira de Pesca, Carmen Gallego, informou que
a Xunta pediu a protección por parte dun organismo “multilateral e multinacional” baixo o amparo da ONU,
para protexer da piratería aos pesqueiros que fanan nas augas das costas africanas e do Océano Índico,
tralo suceso ocorrido contra o atuneiro basco con tripulación galega “Praia de Bakío”. (Fonte: El Correo Gallego).
|
| 27/04/2008 |
|
Marítima
Liberados os secuestrados do “Praia de
Bakío”
Finalmente, mediante pago de rescate por parte do goberno
español, os trece tripulantes do atuneiro basco “Praia de Bakío” foron liberados polos seus secuestradores
somalís, e enviados ás illas Seychelles escoltados pola fragata “Méndez Núñez”.
Os oitos galegos de Baiona, Marín, Cangas e Vigo lograron comunicarse cos seus familiares trala liberación. (Fonte: La Voz de Galicia).
Diáspora
Abrirán oficinas en Europa
A Xunta ampliará ás seis principais cidades
europeas a rede de oficinas de información laboral no exterior que xa existe en América Latina, a
fin de favorecer o retorno de mozos descendentes de emigrantes galegos. Este anunciou foi realizado polo presidente
da Xunta, Emilio Pérez Touriño, no marco dun encontro en París coa mocidade galega residente
en Europa, principalmente de Alemaña, Bélxica, Holanda, Portugal, Suíza, Andorra e Liechtenstein,
que participaron nunha reunión preparatoria do primeiro congreso da mocidade galega residente en países
europeos, a celebrarse en outubro próximo na cidade alemán de Frankfürt. Entre 2002 e 2006 retornaron
a Galicia un total de 38.757 galegos procedentes de países europeos. (Fonte: La Voz de Galicia).
Galicia
Estranxeiros reclusos en Galicia
Marrocos, Alxeria e Portugal son os países con
maior poboación estranxeira reclusa nas cárceres galegas, con 165 naturais destes países.
Romanía, Venezuela, Francia, Gana, Gran Bretaña, Mauritania, República Dominicana, Liberia,
Guinea Ecuatorial, Guinea Bissau, Serbia, Montenegro e México son outros países con reclusos en Galicia,
tanto en poboación masculina como feminina.
(Fonte: La Voz de Galicia).
|
| 26/04/2008 |
|
Cultura
Torre de Hércules como patrimonio
humano
A xuntanza en París entre o presidente da Xunta,
Emilio Pérez Touriño, e o director xeral da UNESCO, o xaponés Koichiro Matsuura, deu un paso
adiante na defensa da candidatura da Torre de Hércules como Patrimonio da Humanidade. A proposta galega
será examinada no cumio de Patrimonio da Humanidade da UNESCO a celebrarse en Sevilla en 2009. (Fonte: La Voz de Galicia).
Portugal
Enxeñeiros transfronteirizos
Un grupo de enxeñeiros de Galicia e Portugal
presentaron en Valença do Minho un proxecto de integración transfronteiriza denominada “Plataforma
para a Mobilidade e Cooperación das Enxeñerías de Galicia e Norte de Portugal”. O obxectivo
é lograr unha maior efectividade neste tipo de cooperación, recoñecida por leis europeas. (Fonte: La Voz de Galicia).
Cuba
Intercambio audiovisual
Tralos acordos alcanzados entre o Consorcio Audiovisual
de Galicia e a secretaría Xeral de Comunicación da Xunta co Instituto Cubano de Arte e Industria
Cinematográficos (ICAIC) en abril de 2007, entre o 12 e 16 de maio celebrarase na Habana unha mostra das
producións audiovisuais galegas e, posteriormente, presentarase en Galicia unha mostra da produción
audiovisual cubana. (Fonte: La Voz de Galicia).
|
| 25/04/2008 |
|
Marítima
Desánimo no “Praia de Bakío”
As breves e escasas conversas telefónicas cos
seus familiares por parte dos oito galegos secuestrados nesta embarcación por piratas en Somalia amosan
o seu nivel de desánimo e preocupación. O goberno español enviou á fragata “Méndez
Núñez”, un avión de combate, tres de destacamento e envío de persoal diplomático
e de negociación, seis axentes do CNI e cinco GEOS para afrontar calquera eventualidade que obrigue ao asalto
pola forza para liberar aos 13 tripulantes.
(Fonte: El Correo Gallego).
Cooperación
A Coruña afronta catro proxectos
A Deputación de A Coruña aprobou catro
proxectos de cooperación internacional, valorados en 259.000 euros, nos que destacan a ampliación
dun orfanato en Addis Abeba, capital etíope, unha campaña institucional de sensibilización
solidaria e a nova sede do patronato da Cultura Galega de Montevideo, capital uruguaia. (Fonte: La Voz de Galicia).
Xacobeo
París apoiará o Camiño
de Santiago
O presidente da Xunta, Emilio Pérez Touriño,
iniciou a súa visita institucional á capital francesa cun encontro coa primeira tenente de alcalde
e conselleira rexional, Anne Hidalgo, con quen acordou estreitar os lazos de cooperación cultural entre
a capital francesa e a galega, aproveitando as sinerxías e potencialidades que ofrece o Camiño de
Santiago. Nesta liña ambos coincidiron en destacar a necesidade de “construír o patrimonio cultural
do futuro” aproveitando tamén as futuras potencialidades da Cidade da Cultura. (Fonte: xornal.com).
Galicia
Rede Europea de Transxénicos
Representantes das Consellarías do Medio Rural
e Medio Ambiente asistiron en Bilbao á VI Conferencia da Rede de Rexións Europeas Libres de Transxénicos,
alimentos modificados xenéticamente. Esta rede está formada por 43 territorios europeos, entre os
que se atopan 15 rexións de Francia, 11 de Italia, 9 de Austria e 2 do Estado español (Asturias e
o País Vasco). (Fonte: xornal.com).
|
| 24/04/2008 |
|
Arxentina
Galicia na Feira do Libro
Por segundo ano consecutivo, unha vintena de editoriais
galegas participaron na Feira do Libro de Bos Aires, dentro dun programa coordinado pola Consellería de
Cultura da Xunta que incluíu mesas redondas, obradoiros e recitais poéticos. Na Feira de Bos Aires
participaron un total de 47 países.
(Fonte: El Correo Gallego).
Marítima
Temen uso da forza no “Praia de Bakío”
Os tripulantes do atuneiro basco “Praia de Bakío”
retido por piratas nas costas somalís, entre eles oito galegos de Baiona e Cangas, amosaron a súa
preocupación ante a posibilidade de que as autoridades españolas utilicen a forza para un asalto
á embarcación, tomando en conta a súa presenza militar naval e aérea. As negociacións
entre o goberno español, as autoridades somalís e o embaixador español en Quenia, non avanzaron
satisfactoriamente. (Fonte: La Voz de Galicia
e Faro de Vigo).
EEUU
Edificio histórico para Casa de
Galicia
A comisión encargada de preservar os edificios
históricos de Nova York incluíu na súa lista ao Webster Hall, adquirido en 1969 pola Unidade
Galega, formada por emigrados da Fronte Popular Antifascista Galega. O Webster Hall foi coñecido polos seus
espectáculos musicais e de teatro.
(Fonte: La Voz de Galicia).
|
| 23/04/2008 |
|
Marítima
Posible intervención militar somalí
Fontes militares deste país e da súa rexión
de Puntlandia afirmaron a posibilidade de asaltar militarmente o barco atuneiro basco “Praia de Bakío”,
a fin de liberar a súa tripulación, na que se atopan cidadáns galegos, secuestrados dende
fai días por piratas. (Fonte: vieiros.com).
Uruguai
Esperan concretar proxecto de Ence
De visita na Deputación de Pontevedra, o ministro
uruguaio de Transportes e Obras Públicas, Víctor Rossi, afirmou esperar que “o importante investimento”
que supón o proxecto de Ence en Conchillas, xunto ao río da Plata na fronteira uruguaia con Arxentina,
logre concretarse sen problemas, tras decidirse “por ampla maioría” a posta en marcha deste proxecto. (Fonte: La Voz de Galicia).
China
Empresarios apoian a Expo Xangai
O empresariado santiagués anunciou o seu apoio
á presenza de Santiago na Feira Internacional de Xangai 2010, na que se ofrecerá unha ampla exposición
da gastronomía e cultura de Galicia, con especial énfase na súa oferta hostaleira e a difusión
do seu patrimonio histórico. (Fonte:
La Voz de Galicia).
Galicia
Touriño na UNESCO
O presidente da Xunta de Galicia, Emilio Pérez
Touriño, partirá en viaxe oficial a París a fin de reunirse co director xeral da UNESCO, M.
Koichiro Matsuura, así como para manter un encontro coa colectividade galega residente na capital gala. (Fonte: xornal.com).
|
| 22/04/2008 |
|
Galicia
Aumentan afiliados estranxeiros
Segundo datos do Instituto Nacional de Estatística,
o número de afiliados estranxeiros en Galicia aumentou a 42.776 en marzo, un incremento interanual de 19,7%. (Fonte: xornal.com).
Uruguai
Novas vías de investimento
O ministro uruguaio de Obras Públicas e Transporte,
Víctor Rossi, encabezou unha delegación de empresarios deste país sudamericano para visitar
Galicia e entrevistarse coas autoridades políticas e diversos empresarios. Rossi instou a investir no sector
da construción no seu país, especialmente ante a auxe do sector inmobiliario, así como na
posibilidade de alcanzar novas vías de colaboración en materia portuaria e marítima. (Fonte: Galicia Hoxe e xornal.com).
|
| 21/04/2008 |
|
Pesca
Secuestrado atuneiro en Somalia
O atuneiro basco “Praia de Bakío”, con oito tripulantes
galegos, foi secuestrado por piratas nas augas internacionais de Somalia, na costa nororiental africana. O BNG
solicitoulle ao goberno estatal maiores medidas de prevención para evitar estes actos de piratería. (Fonte: Galiza Nación e Vieiros).
|
| 20/04/2008 |
|
Venezuela
Nova fase na busca de Reinoso
O comisario Luis Monroy, da Brigada Antiextorsión
e Secuestros do Corpo de Investigacións Científicas, Penais e Criminalísticas (CICPC) anunciou
o inicio dunha nova fase de redadas na busca do emigrante galego Raimundo Reinoso, secuestrado o pasado 26 de febreiro
na capital, Caracas. Reinoso, de 67 anos, atopase nunha situación delicada de saúde. As operacións
están desenvolvéndose na capital e no estado occidental de Zulia. Os secuestradores pediran 150.000
pola súa liberación. (Fonte:
El Correo Gallego).
|
| 19/04/2008 |
|
Unión Europea-Galicia
Santiago e o URBACT II
O departamento de Urbanismo do concello de Santiago
será o encargado de liderar o programa europeo Urbact II, que ten como finalidade analizar as políticas
de vivenda na UE, a fin de deseñar os proxectos destinados á integración e cohesión
social. Xunto a Santiago foron elixidas as cidades de Hamburgo (Alemaña), Medway (Reino Unido), Nantes (Francia)
e Siemianowice Slaskie (Polonia). (Fonte:
El Correo Gallego).
|
| 18/04/2008 |
|
Galicia
Ourense promove bolsas internacionais
Un total de 40 alumnos ourensáns
recen titulados serán beneficiados por unha bolsa internacional financiada pola Deputación para realizar
prácticas en empresas e aprendizaxe de idiomas durante tres e catro meses en Portugal, Italia, Francia,
Alemaña e Irlanda. (Fonte: La Voz
de Galicia).
Galicia
A Bos Aires galega
O Consello da Cultura Galega presentou
o libro de Rui Farías “Buenos Aires gallega”, que reúne unha serie de conferencias ditadas en agosto
de 2007 na capital arxentina, sobre a pegada da inmigración galega no país sudamericano. (Fonte: La Voz de Galicia).
Turismo
Santiago promóvese en China e
Xapón
O presidente da Xunta, Emilio Pérez
Touriño, e o alcalde santiagués Xosé Sánchez Bugallo, acordaron o apoio oficial á
participación de Santiago na Exposición Universal Xangai 2010. Ademais de a China, a concellería
de Promoción Económica de Santiago dirixe a súa atención cara Xapón, trala participación
en foros turísticos nas cidades de Tanabe e Tokio.
(Fonte: La Voz de Galicia).
Economía
Instan a investir en América Latina
Durante unha xuntanza celebrada en Vigo,
o representante do Banco Mundial e especialista en auga e saneamento para América Latina, Manuel Mariño,
animou ao empresariado galego a formular vías de investimento en América Latina e países en
desenvolvemento,a fin de propiciar mellores mecanismos de desenvolvemento económico. Outro eido de importancia
é o factor enerxético, instando a exportar a experiencia nesta materia. (Fonte: La Voz de Galicia e El Correo Gallego).
Inmigración
Colaboración para a integración
O secretario xeral de Emigración,
Manuel Luís Rodríguez, e o presidente da Federación Galega de Municipios e Provincias (FEGAMP)
e alcalde de Ames, Carlos Fernández, fixaron os termos da colaboración que os seus departamentos
manterán en materia de inmigración para prestar información, orientación e asesoramento
xurídico e socio-laboral aos concellos de Galicia en unidades especializadas para o desenvolvemento de actuacións
como: información xurídica e trámites administrativos a realizar; difusión de información
sobre a tramitación de permisos de residencia, traballo, visados, adquisición de nacionalidade, agrupamento
familiar, programas formativos e de inserción laboral, entre outras cuestións. (Fonte: xornal.com).
|
| 17/04/2008 |
|
Marítima
Visita da armada norueguesa
O alcalde de Ferrol, Vicente Irrarri,
recibiu a Svein Erik Kvalvaag, comandante da terceira fragata que Navantia constrúe para a Armada de Noruega,
a ser entregada a finais de abril. Irrarri e Kvalvaag coincidiron en reforzar os lazos entre Ferrol e Noruega,
principalmente no eido marítimo.
(Fonte: La Voz de Galicia).
Pesca
Regresa tripulación de Gabón
A tripulación galega e andaluza
dos nove barcos que levaban desde hai máis dun mes inmobilizados en Santo Tomé, en Gabón,
regresou a Huelva, porto base dos buques e a armadora.
(Fonte: Galiza Nación).
|
| 16/04/2008 |
|
Diáspora
Acordo político para a lei electoral
Nunha inédita comparecencia ante
os medios de comunicación, os representantes dos tres partidos políticos con presenza no Parlamento
galego, o PPdG, o PSdG e o BNG, anunciaron o seu acordo de enviar ao goberno estatal a proposta de reforma da lei
electoral para que os emigrantes poidan exercer o seu voto en urna, de cara ás próximas eleccións,
a celebrarse no 2009. (Fonte: Vieiros e
Galiza Nación).
Galicia
Apertura da Casa do Brasil
A Asociación Cultural de Brasil
en Galicia abriu en Santiago a Casa do Brasil como espazo de encontro entre a comunidade emigrante brasileira e
os demais colectivos sociais en Galicia.
(Fonte: La Voz de Galicia).
Uruguai
Abrirán representación
da Xunta
Trala apertura en Bos Aires en outubro
de 2007 da Oficina de Representación da Xunta no Exterior, o secretario xeral de Relacións Exteriores,
Julio César Fernández Mato, anunciou que será en Montevideo, a finais de 2008, cando se abra
a segunda oficina de representación exterior da Xunta.
(Fonte: La Voz de Galicia).
|
| 15/04/2008 |
|
Portugal
Reforzan a cooperación cultural
A consellería de Cultura e varios
responsables do goberno portugués asinaron en Santiago a presentación de catro proxectos transfronteirizos
Galicia-Portugal para as axudas europeas Interreg IV-A, coa pretensión de alcanzar o financiamento Feder
dun 75% dos 6,28 millóns de euros de investimento para proxectos comúns en cultura, deporte tradicional
e patrimonio. (Fonte: El Correo Gallego).
EEUU
Xira do Viño de Valdeorras
A bodega ValdeSil, de Vilamartín
de Valdeorras, iniciará unha xira de promoción dos seus viños por EEUU, concretamente nas
cidades de Nova York, Dallas e San Francisco, participando en diversas feiras gastronómicas. (Fonte: La Voz de Galicia).
Unión Europea-Marítima
Problemas polo encarecemento do gasóleo
O xerente adxunto da Cooperativa de Armadores
de Vigo, José Antonio Suárez-Llanos, quen tamén é secretario da European Association
of Fish Producers Organization, reuniuse co eurocomisario de Pesca, Joe Börg, a fin de recramar medidas para
evitar que o encarecemento do prezo do gasóleo afecte á actividade pesqueira dos armadores vigueses. (Fonte: La Voz de Galicia).
Diáspora
Conversas pola reforma do voto emigrante
Tras cinco meses de paralización,
os tres grupos políticos con representación no Parlamento galego, o PSdG, o PPdG e o BNG, reuníronse
para retomar as conversas sobre a reforma da normativa que regulamenta o voto dos galegos que residen no exterior.
Nas anteriores reunións celebradas en outono de 2007, evidenciáronse discrepancias de fondo entre
as tres forzas políticas. (Fonte:
Galiza Nación).
|
| 14/04/2008 |
|
Diáspora
A cultura no exterior
A secretaría xeral de Emigración
abriu unha liña de axudas para fomentar a realización de actividades culturais nas comunidades galegas
do exterior que compartan vida social e cultural con Galicia. O orzamento está cifrado en 120.000 euros,
principalmente destinados a difundir o patrimonio galego no exterior.
(Fonte: La Voz de Galicia).
|
| 13/04/2008 |
|
Sáhara
Na busca co seu recoñecemento
O Parlamento galego acolleu a duodécima
edición da Conferencia de Intergrupos Parlamentarios baixo o lema “Paz e Liberdade”, na que se aprobou unha
resolución sobre a situación actual do Sáhara Occidental. Neste acto participaron o delegado
en España da República Árabe Saharauí Democrática (RASD), Bucharai Hamudi, representantes
do Fronte Polisario en España e doutras institucións solidarias co pobo saharauí. Neste sentido,
o deputado do BNG, Xosé Ramón Paz Antón, rexistrou unha proposición non de lei que
insta ao goberno español a recoñecer de forma oficial á RASD. (Fonte: La Voz de Galicia e Galiza Nación).
Perú
Galegos abren nova ruta
Os montañeiros Rubén Suárez
e Pablo Fadeville, naturais do concello coruñés de Negreira, foron invitados a unha expedición
para achegarse á mítica cidade perdida de Vilcabamba la Grande, na selva peruana, na que tentarán
abrir outra vía cara a cima do Nevado Choquezafra, de 5.164 metros, así como unha segunda vía
con maior dificultade orográfica.
(Fonte: El Correo Gallego).
|
| 12/04/2008 |
|
Galicia
Polémica viaxe a China
Representantes do PPdG, o PSdG, o BNG
e a Deputación de Lugo reuníronse para tratar aspectos relativos a unha viaxe oficial a China, cun
marcado carácter comercial. As empresas Ingapán, Azkar e Puerto de Celeiro confirmaron a súa
asistencia. Un tema a discusión foi a situación dos dereitos humanos no Tíbet e a conveniencia
de realizar esta viaxe institucional. (Fonte:
La Voz de Galicia).
Galicia
Referencia veterinaria para Europa
Unha comisión de expertos da Asociación
Europea de Establecementos de Ensinanza Veterinaria (AEEEV) supervisou satisfactoriamente a facultade de Veterinaria
da USC en Lugo, considerando no seu ditame que este centro non posúe ningunha deficiencia significativa,
constatándoa como un “modelo de traballo a seguir” noutros centros europeos. (Fonte: El Progreso).
|
| 11/04/2008 |
|
Galicia
Proxecto Home para Europa
Unha delegación da Federación
Europea de Comunidades Terapéuticas (EFTC) visitou Santiago para coñecer o labor que desenvolven
os centros do Proxecto Home a través de programas de rehabilitación e reinserción social de
persoas drogodependentes en Galicia. A EFTC reúne a 25 países europeos e amosou o seu interese en
coñecer o modelo formativo de inserción que se desenvolve en Galicia. (Fonte: El Correo Gallego).
Unión Europea-Galicia
Aumentan os bolseiros do Erasmus
A consellería de Educación
ampliará a 190 o número de bolseiros estranxeiros que participarán no Plan de Ensinanza de
Linguas Estranxeiras nas tres universidades galegas, especialmente centrados na ensinanza do inglés e do
francés. (Fonte: El Correo Gallego).
|
| 10/04/2008 |
|
Galicia
Irmanamento con Australia
O alcalde ferrolán Vicente Irisarri,
activou os contactos diplomáticos para o irmanamento entre Ferrol e a cidade australiana de Adelaide, principalmente
pola notable relación naval existente coa empresa Navantia na construción de barcos para a Armada
australiana. A posibilidade do irmanamento tamén contempla o intercambio estudantil con mozos australianos. (Fonte: El Correo Gallego).
Portugal
Recepción da TV e radio en portugués
O Parlamento galego aprobou por unanimidade
unha proposición non de lei presentada polo BNG para posibilitar a recepción das televisións
e radios portuguesas en Galicia. A iniciativa foi defendida polo portavoz en materia lingüística do
Bloque, Bieito Lobeira, quen indicou que con este paso se trata de “corrixir unha constante histórica de
ruptura entre pobos irmáns por motivos estritamente políticos”. (Fonte: Vieiros).
Cuba
Os gastos da Feira do Libro
Durante a súa comparecencia ante
o Parlamento galego, a conselleira de Cultura, Ánxela Bugallo, asegurou que o custe final da expedición
galega á Feira do Libro da Habana foi de 1,3 millóns de euros. Bugallo saíu así ás
críticas do PPdG sobre o custe real dos gastos desta viaxe institucional. (Fonte: La Voz de Galicia).
Brasil
Ferrol promoverá feira loxística
A Autoridade Portuaria Ferrol-San Cibrao
promoverá a Intermodal South America, a maior feira loxística naval e marítima de América
Latina, a celebrarse en São Paulo (Brasil), a mediados de abril.
(Fonte: La Voz de Galicia).
|
| 09/04/2008 |
|
Galicia
Acollerán a nenos de Chernobil
Dez rapaces rusos afectados pola catástrofe
da central nuclear de Chernobil en 1986 serán acollidos na nosa Comunidade o próximo verán,
dentro dun programa levado a cabo pola ONG ourensá “Ledicia Cativa”. (Fonte: La Voz de Galicia).
Unión Europea-Galicia
Sen base contra vertidos
A Axencia Europea de Seguridade Marítima
(AESM) asegurou non ter nos seus plans inmediatos colocar en Galicia ningún dos 16 barcos anticontaminación
subcontratados por este organismo dependente da Comisión Europea. O mar Negro e o mar do Norte serán
os beneficiados a mediano prazo. (Fonte:
La Voz de Galicia).
Portugal
Coordinarán inspeccións
laborais
O presidente da Xunta, Emilio Pérez
Touriño, anunciou no Parlamento galego que a Consellería de Traballo promoverá a celebración
dun encontro, o vindeiro 25 de abril na cidade de Ourense, co fin de coordinar as inspeccións de traballo
de Galicia e do norte de Portugal. (Fonte:
xornal.com).
Portugal
Voz galega na Asemblea portuguesa
Alexandre Banhos, presidente da AGAL,
e Ângelo Cristóvão, presidente da Associação Pró-Academia Galega da Língua
Portuguesa, falaron en nome das entidades lusófonas de Galicia na Asemblea portuguesa, con motivo da Conferencia
Internacional Parlamentar sobre o Acordo Ortográfico da Língua Portuguesa, organizada pola Comissão
de Ética, Sociedade e Cultura da Assembleia da República.
(Fonte: Vieiros).
|
| 08/04/2008 |
|
Galicia
Denuncian o custe da feira de Xangai
O portavoz do PPdG en Santiago, Gerardo
Conde Roa, denunciou que a presenza da capital galega na Feira de Xangai 2010 custará cinco millóns
de euros, o que estima un “xesto excesivo” porque supera as posibilidades económicas do concello santiagués. (Fonte: El Correo Gallego).
Galicia
Intercambio estudantil en Bertamiráns
Unha delegación de tres profesores
e nove mozos provenientes de institutos de Grecia, Italia e Francia foi recibida no IES de Ames en Bertamiráns,
como parte do programa europeo Comenius. En Ames coordínase este proxecto desde 2006. (Fonte: El Correo Gallego).
Galicia
Bolsas en empresas europeas
A Universidade da Coruña acaba
de convocar 30 bolsas Leonardo para que titulados recentes realicen prácticas en empresas de Alemaña,
Francia, Italia, Portugal, Reino Unido e República Checa. Estas bolsas totalizan un valor de 81.754 euros. (Fonte: La Voz de Galicia).
Galicia
Lira interesa en Xapón
A cadea xaponesa Televisión Nishinihon
(TNC) realizará en Lira (Carnota) un documental denominado “Conservamos a nosa terra”, onde tratará
a loita dos pescadores galegos e xaponeses por manter limpas e vivas as súas rías. Paralelamente,
o documental ofrecerá unha perspectiva de como os habitantes da Costa da Morte afrontaron a traxedia do
Prestige e os incendios forestais. (Fonte:
El Correo Gallego).
Economía
Promoción exterior do viño
galego
Un total de oitenta bodegas das cinco
Denominacións de Orixe de viño galegas Rías Baixas, Ribeiro, Monterrei, Valdeorras e Ribeira
Sacra, e unha de licores, participarán no encontro internacional Vinis Terrae en Ourense, onde tentarán
aumentar a súa promoción exterior nun encontro con representantes de 16 países, especialmente
EEUU, Suíza e Xapón. (Fonte:
El Correo Gallego).
Portugal
Nova edición de Ponte nas...ondas!
O Colexio Oficial de Arquitectos de Galicia
(COAG) presentou en Santiago a XIV edición da xornada de radio interescolar “Ponte nas... Ondas!” , na que
participarán 40.000 alumnos de 90 centros de Galicia e do norte de Portugal. (Fonte: La Voz de Galicia).
Solidariedade
Visita de técnicos indios
A ONG ‘Implicadas/os no desenvolvemento’
organizou unha viaxe a Galicia dos técnicos indios I. Ambalavanan e P. Bobby, para dar a coñecer
á sociedade galega a situación da comunidade local de Tamil Nadu, Karaikal e Salem, onde a ONG ten
proxectos en marcha, mostrando os beneficios e os cambios que supuxeron para a vida da comunidade os proxectos
de cooperación ao desenvolvemento que a organización apoia e financia nesta rexión, e que
leva a cabo xunto coa organización local People Development Iniatives (PDI). (Fonte: Vieiros).
|
| 07/04/2008 |
|
Unión Europea-Galicia
Recoñecer o queixo San Simón
O Diario Oficial das Comunidades Europeas
publicou a solicitude de inclusión da Denominación de Orixe Protexida San Simón da Costa no
Rexistro das Indicacións Xeográficas e das Denominacións de Orixe, fase final para ser oficialmente
recoñecida. Estes queixos da Terra Chá producen 300.000 quilos anuais. (Fonte: El Correo Gallego).
Solidariedade
Vigo cos nenos de Zambia
A ONG Proyecto Humi pretende atender as
necesidades de 220 nenos orfos da localidade de Mishikishi en Zambia, razón pola que realizou unha parada
en Vigo co programa “Un vaso de leite para cada neno”.
(Fonte: La Voz de Galicia).
|
| 06/04/2008 |
|
Cuba
A pegada ourensán
A publicación “Ourensáns
en Cuba”, promovida pola Unión Ourensán da Habana e a Fundación Fernández Ortiz, editada
por Tórculo Edicións, permitiu a recompilación de testemuñas de diversos ourensáns
anónimos que tiveron unha profunda presenza na illa caribeña, así como outras figuras ilustres
como Curros Enríquez e Basilio Álvarez. A recompilación foi realizada por Aurelio Francos
Lauredo. (Fonte: La Voz de Galicia).
Inmigración
Un colexio multicultural
O colexio público de Barcelos en
Pontevedra permite a convivencia de alumnos de trece países distintos, así como de tres relixións
diferentes, correspondendo a un 15% do seu alumnado. Algúns dos países de orixe dos rapaces matriculados
son Romanía, Gana, China, Brasil, México, Arxentina, Colombia, Venezuela, Ecuador e Perú. (Fonte: La Voz de Galicia).
Solidariedade
Noite solidaria con Bolivia
Unha trintena de pubs e locais de ocio
da Coruña realizaron unha iniciativa denominada “Noite Solidaria”, para colaborar coa ONG Solidariedade
Internacional para recadar 0,20 euros de cada consumición para un proxecto no pobo boliviano de Sorata.
O programa desenvolverase posteriormente ata xullo en Ferrol, Pontevedra, Vilagarcía de Arousa, Vigo, Portonovo
e Cangas. A ONG realizou anteriormente esa mesma iniciativa cara proxectos en Angola, Nicaragua, o Sáhara
e Palestina. (Fonte: La Voz de Galicia).
|
| 05/04/2008 |
|
Diáspora
Herdanzas sen cobrar
En diversas reportaxes publicadas no diario
arxentino La Nación relátase que cada ano morren 5.000 galegos emigrantes, deixando sen cobrar as
súas herdanzas en Galicia. Este baleiro patrimonial ven precedido pola ausencia dun banco de datos da diáspora
que permita á Xunta e aos bancos galegos atopar aos herdeiros, tal e como sucede nos países anglosaxóns.
As propiedades abandonadas nas zoas rurais provocan incendios e aproveitamentos indebidos. (Fonte: Nova +).
Galicia
Carencias do sistema xudicial
A falta de investimentos oficiais no sistema
xudicial en Galicia provoca un marcado déficit en materia de xuíces en comparación con outros
países europeos. En Galicia existen 9 xuíces por cada 100.000 habitantes, mentres en países
como Alemaña, Francia, Italia ou Grecia existen entre 20 e 24 xuíces para o mesmo número de
habitantes. (Fonte: El Correo Gallego).
Unión Europea-Galicia
Desenvolvemento rural en Ferrol
Un total de 33 entidades aspirarán
a xestionar os fondos europeos para o desenvolvemento rural dentro da convocatoria 2007-2013, nas comarcas de Ferrolterra,
Eume e Ortegal. (Fonte: La Voz de Galicia).
Inmigración
Case cinco mil en Vigo
Un total de 4.726 estranxeiros dos 16.342
que habitan en Vigo foron empadroados nos derradeiros meses, principalmente de Portugal, Brasil, Arxentina, Uruguai,
Bolivia, Perú, Ecuador e Venezuela. A poboación inmigrante en Vigo xa representa o 5,5% dos habitantes
desta cidade. (Fonte: La Voz de Galicia).
Cabo Verde
Un novo porto pesqueiro
A conselleira de Pesca, Carmen Gallego,
avogou pola cooperación exterior durante o II Seminario Internacional do Clúster de Empresas Pesqueiras
en Países Terceiros celebrado en Huelva. Gallego informou que a Xunta construirá un novo porto pesqueiro
en Cabo Verde, que beneficiará á flota palangreira galega, a maior da Unión Europea, que fana
nese caladoiro. Do mesmo xeito, Gallego comprometeuse cos ministros de Pesca de Mozambique e Guine Bissau na posta
en marcha de iniciativas conxuntas para construír infraestruturas portuarias, en acuicultura e vixilancia
pesqueira, entre outras. (Fonte: Empresa
y Finanzas).
|
| 04/04/2008 |
|
China
Dúbidas sobre Xangai 2010
O portavoz do PPdG, Conde Roa, considerou
que se ben a presenza de Compostela na Feira Internacional Xangai 2010 é “positiva”, explicou que sería
mais adecuado realizar unha promoción da capital galega en Europa. (Fonte: El Correo Gallego).
Venezuela
Sen noticias de Raimundo Reinoso
O comisario Sergio González, da
División Antiextorsión e Secuestro do Corpo de Investigacións Científicas Penais e
Criminalísticas de Venezuela, informou que non se teñen noticias sobre o paradoiro do emigrante galego
Raimundo Reinoso, de 67 anos, secuestrado o pasado 26 de febreiro. A policía venezolana comeza a perder
as esperanzas de atopar a Reinoso con vida.
(Fonte: La Voz de Galicia).
Economía
IGAPE promoverá a Caneliñas
O conselleiro de Economía e Facenda
e presidente do IGAPE, José Ramón Fernández Antonio, e o presidente do Porto de Ferrol, Amable
Dopico, asinaron un convenio de colaboración por importe de 140.000 euros, para promover internacionalmente
a rada exterior de Caneliñas, unha das comarcas ferrolás que forma parte do Plan de Desenvolvemento
Integral das Comarcas de Ferrol, Eume e Ortegal, coordinadas polo IGAPE. Este organismo informou que participará
nas feiras internacionais de París, São Paulo, Xangai, Bombay, Abu Dhabi, Xapón e Corea do
Sur. (Fonte: La Voz de Galicia).
|
| 03/04/2008 |
|
China
Compostela en Xangai 2010
Santiago de Compostela terá representación
propia na Exposición Universal que se realizará na cidade chinesa de Xangai en 2010, trala selección
realizada polo Comité Internacional entre 30 cidades que disporán do seu propio pavillón.
O concello santiagués contará co apoio do Consorcio de Santiago e espera ampliar a cooperación
coa Xunta durante os seis meses que durará a Exposición en Xangai. (Fonte: El Correo Gallego).
Cuba
Polémica pola viaxe oficial
Os deputados do PPdG, Ignacio López
Chaves e César Pérez consultaron a documentación que a consellería de Cultura aínda
non remitiu ao Parlamento galego sobre a viaxe da conselleira Ánxela Bugallo á Feira Internacional
do Libro da Habana, denunciando a ausencia da xustificación dos custes desta viaxe oficial. No PPdG falouse
de “ocultación” e “risco de maquillaxe” mentres na consellería prometeron a presentación parlamentaria
dos datos. (Fonte: La Voz de Galicia).
Galicia
Vigo na autopista do mar
A comisión intergobernamental de
Francia e España amosou a súa intención de sinalar os portos de Vigo e Xixón como eixes
fundamentais do tráfico marítimo, dentro da proxección do proxecto atlántico de autopistas
do mar. (Fonte: Faro de Vigo).
Galicia
Os desaparecidos da Arxentina
A testemuña protexida e membro
da Asociación de Exdetidos-desaparecidos (AEDD) de Arxentina, Nilda Eloy, falou en Santiago sobre os xuízos
contra os xenocidas no país sudamericano e da loita contra a impunidade. A charla, organizada polo Club
Internacional de Prensa dentro do ciclo “América Latina: presente indicativo”, tratou sobre a anulación
das Leis de Obediencia Debida e Punto e Final en Arxentina, o que posibilitou a apertura nos últimos anos
de xuízos contra os responsables de asasinatos na ditadura militar. (Fonte: Galiza Nación).
Unión Europea-Galicia
Unha aposta pola diáspora
O presidente da Xunta, Emilio Pérez
Touriño, indicou que a UE impulsará un proxecto dirixido á colectividade galega en Iberoamérica
para contribuír á difusión das políticas europeas, proceso no que tamén participará
a Fundación Galicia Europea a través dos programas europeos Erasmus Mundus. En principio, estase
formulando a posibilidade de iniciar estes programas en Arxentina e Uruguai para así expandir este proxecto
cara outros países latinoamericanos.
(Fonte: Faro de Vigo).
Unión Europea-Galicia
Propostas galegas no sector lácteo
O conselleiro do Medio Rural, Alfredo
Suárez Canal, entrevistouse en Bruxelas coa comisaria europea de Agricultura e Desenvolvemento Rural, Mariann
Fischer, para informala da situación do sector lácteo galego e para trasladarlle propostas sobre
a incidencia do acordo adoptado para o incremento lineal do 2% da cota en todos os estados membros e a posición
de Galiza con respecto á reforma da PAC.
(Fonte: xornal.com).
|
| 02/04/2008 |
|
Unión Europea-Galicia
Mercados en Europa do Leste
O presidente da Xunta, Emilio Pérez
Touriño, anunciou a súa intención de intensificar as actividades da Fundación Galicia
Europa para promover Galicia nos países de Europa do Leste que se incorporaron á UE. Estas afirmacións
realizáronse durante a apertura en Bruxelas da nova sede deste fundación, con motivo do seu vixésimo
aniversario. Nesta ocasión, Touriño entrevistouse cos comisarios europeos para Política Exterior
e de Seguridade, Javier Sólana, e de Asuntos Económicos, Joaquín Almunia. Pola súa
banda, a comisaria de Política Rexional, Danuta Hübner, confirmou o apoio financeiro de Bruxelas ao
desenvolvemento de Galicia no período 2007-2013.
(Fonte: El Correo Gallego e AGN).
Unión Europea-Pesca
Prórroga para o porto exterior
coruñés
Segundo afirmou a Autoridade Portuaria
de A Coruña, ao ritmo actual, as obras de ampliación do seu porto exterior rematarían no 2011,
cumprindo os seis anos e medio previstos inicialmente. Non obstante, a previsión para ese ano é de
avanzar 800 metros na construción do dique, razón pola que o ente público deberá pedir
unha prórroga para alcanzar os 257 millóns de euros aprobados pola UE nos Fondos de Cohesión. (Fonte: La Voz de Galicia).
Xacobeo
Delimitarán os camiños
inglés e portugués
A consellería de Cultura anunciou
que sacará a concurso o estudo do territorio histórico dos camiños inglés e portugués,
cun orzamento calculado en 520.000 euros para 2008 e 2009. O investimento do camiño portugués resultará
o de maior orzamento, debido a que inclúe os traxectos dende as provincias de A Coruña e Pontevedra. (Fonte: El Correo Gallego).
Economía
Compra empresarial galega
A firma galega Cupa Group, asentada en
Valdeorras (Ourense), mercou o grupo británico Burton Roofing Merchant, o principal distribuidor de produtos
para cubertas neste país, coa maioría accionarial do 84%, calculado en 26 millóns de euros.
Burton conta con cinco almacéns en Newcastle, Hull, Sockton, York e Leeds. (Fonte: El Correo Gallego).
Portugal
Acordo para piscifactoría de Mira
Os representantes do goberno portugués
e Pescanova asinaron un acordo para a construción dunha macropiscifactoría de rodaballos no concello
luso de Mira. Segundo este convenio, o goberno portugués achegará un mínimo de 43 millóns
de euros, a pesar de que moitos grupos ecoloxistas reclamen a paralización das obras debido á proximidade
do parque acuícola a terreos protexidos.
(Fonte: Vieiros).
Cuba
Cambios políticos positivos
Un grupo de empresarios galegos e españois
cualificaron en Vigo como “positivo” o cambio político ocorrido no país caribeño, coa elección
de Raúl Castro como presidente, especialmente no referente á apertura económica e no sector
hostaleiro cara a poboación cubana. Un total de 15 firmas galegas están presentes na illa caribeña,
sendo de especial interese os sectores de acuicultura, naval e alimentación. (Fonte: AGN).
|
| 01/04/2008 |
|
Galicia
Reunión de cúpula xudicial
O Comité Directivo da Organización
Europea das Institución Rexionais de Control Externo do Sector Público (EURORAI) reuniuse coa presidenta
do Parlamento galego, Dolores Vilarino, a fin de compartir experiencias e intercambiar os seus coñecementos
sobre as súas funcións. Este organismo reúne a 62 representantes de tribunais de contas de
18 países europeos. (Fonte: El Correo
Gallego).
Galicia
Artes escénicas con Iberoamérica
O coordinador do programa Iberescena,
Guillermo Heras, presentou en Santiago a súa iniciativa para crear un espazo de integración entre
profesionais galegos das artes escénicas e os seus homólogos de Colombia, Arxentina, Chile, España,
México, República Dominicana e Venezuela.
(Fonte: El Correo Gallego).
Portugal
Ponteareas busca o recoñecemento
internacional
O concello de Ponteareas traballa nun
expediente para promover a súa festa do Corpus Christi como Festa de Interese Turístico Internacional.
Para tal fin, a concellería de Turismo dese concello pontevedrés promove o seu turismo en Lisboa
e noutras oficinas de turismo galegas en Portugal.
(Fonte: La Voz de Galicia).
Portugal
Proxectos culturais e turísticos
Os representantes dos concellos portugueses
de Montalegre, Terras de Bouro, Arcos de Valdevez e Ponta da Barca reuníronse cos seus homólogos
ourensáns en Lobios, para concretar os proxectos comúns en materia cultural e turística, dentro
do marco de cooperación europeo transfronteirizo.
(Fonte: La Voz de Galicia).
|
