|
 |
| 31/01/2008 |
|
Unión Europea-Galicia
Retraso na creación das AECT
A comisaria europea de Política
Rexional, Danuta Hübner, respondeu ao eurodeputado polo PPdG, Daniel Varela, que o Estado español retrasa
o desenvolvemento da lei comunitaria que prevé a aprobación do marco xurídico das Asociacións
Europeas de Cooperación Transfronteiriza (AECT), que unirá a Galicia co Norte de Portugal, a pesar
da recente aprobación por parte do Consello de Ministros.
(Fonte: La Voz de Galicia).
Cultura
O musical galego en Cannes
A consellería de Cultura levará
un amplo abano musical galego ao certame Midem de Cannes (Francia), unha das feiras musicais máis importantes
do mundo, que conta coa presenza de 10.000 profesionais procedentes de 90 países. (Fonte: La Voz de Galicia).
Portugal
Alta velocidade para o 2012
O presidente da Xunta, Emilio Pérez
Touriño, asegurou que Galicia está a dar un “salto histórico” para contar no 2012 cunha rede
de autovías de alta velocidade, que unirá o interior galego con Portugal. Esta rede partirá
dende Vilalba ata Verín e a fronteira portuguesa, con especial énfase en Porto. (Fonte: xornal.com).
Economía
Peletería galega na India
A Cámara de Comercio santiaguesa
organizou a asistencia de once empresas de peletería á feira empresarial da localidade india de Chennai,
sendo este país despois de China o principal receptor de productos de peletería fabricados en Galicia. (Fonte: El Correo Gallego).
|
| 30/01/2008 |
|
Turismo
Mais turistas estranxeiros para Compostela
Por primeira vez, o número de turistas
estranxeiros superou aos españois en visitas á capital galega, cun total de 58.700 estranxeiros por
55.326 nacionais no 2007, que corresponde a un crecemento do 21,9% fronte a un 5,9% respectivamente. Como dato
de importancia considerase a presencia en Compostela de visitantes de países tan afastados xeograficamente
como San Marino, Dominica, Botswana, Iraq, Illas Fidji, Kirguizistán, Laos, Serra Leona, Omán, Vietnam,
Illa Reunión, Granada, Malawi e Australia.
(Fonte: La Voz de Galicia).
Galicia
Irmanamento en Romanía
O alcalde compostelán Xosé
Sánchez Bugallo reuniuse co presidente da Asociación Puente Cultural Rumano-Gallego, Ion Stan, e
o alcalde da localidade rómana de Sighisoara, Ioan Dorin Danesa, a fin de propiciar un irmanamento entre
ambas cidades. O alcalde romanés invitou a Bugallo a asistir en maio a unha xuntanza de cidades irmanadas
con Sighisoara. En Santiago habitan un total de 200 rómanos, dos 2.200 existentes en Galicia, segundo datos
da Asociación fundada no 2005. (Fonte:
El Correo Gallego).
China
Investimento solar en Galicia
Yang Liyou, xerente xeral da empresa Chint
Solar, filial da estatal eléctrica chinesa Chint, considerada a maior de China e a terceira do mundo, amosou
o seu interese en promover parques solares en Galicia, trala visita realizada polo propietario de Chint, Cunhui
Nam, ao presidente da Xunta, Emilio Pérez Touriño.
(Fonte: El Correo Gallego).
Unión Europea-Pesca
Máis competencias para a Axencia
Pesqueira
Durante a Asemblea Xeral de Europeche,
organismo que reúne a todas as empresas pesqueiras da UE, o comisario europeo de Pesca, Joe Börg, insistiu
na intención de Bruxelas de aumentar as competencias da Axencia Europea de Control da Pesca, que se trasladará
a Vigo a mediados de 2008. Estas competencias estarían dirixidas a coordinar todas as actividades de inspección
e control nos países da UE. (Fonte:
AGN).
Diáspora
O pulso polo voto emigrante
O PPdG e o BNG insisten na aprobación
do voto en urna para acabar coas sospeitas xeradas nas derradeiras eleccións autonómicas de 2005.
Mentres, o PSdG ofrece a creación dunha circunscrición electoral para os emigrantes. En todo caso,
o goberno estatal considera que a reforma non estaría lista ata o 2012. Arxentina lidera o voto da diáspora
cun 36%, seguido de Venezuela, Suíza e Brasil.
(Fonte: El Correo Gallego).
Diáspora
Medra o censo de residentes
O censo de composteláns residentes
no exterior aumentou un 20%, un total de 7.000 cidadáns, durante o 2007, segundo explicou o alcalde santiagués
Xosé Sánchez Bugallo, quen reuniuse coa concelleira en Benestar Social, Mar Martín, e o presidente
da Fundación Galicia Emigración, Juan Carlos Pérez Santiago, para avaliar os proxectos de
centros de día en Arxentina e Uruguai.
(Fonte: El Correo Gallego).
|
| 29/01/2008 |
|
Unión Europea-Pesca
Reunión en Vigo
O Museo do Mar da cidade olívica
foi a sede dunha reunión internacional sobre pesca entre representantes da Unión Europea e o Consello
Internacional para a Exploración do Mar (ICES, polas súas siglas en inglés), na que científicos
e representantes do sector pesqueiro europeo colaboraron na xestión de numerosas especies de interese comercial. (Fonte: La Voz de Galicia).
Galicia
O Magreb, protagonista en Pontevedra
A Bienal de Arte de Pontevedra 2008 que
celebrará no verán de 2008 a súa trixésima edición, contará coa participación
de Marrocos, Tunicia e Alxeria como expresión da multiculturalidade e as relacións con norte de África. (Fonte: La Voz de Galicia).
Portugal
Emancipación para a eurorrexión
Carlos Cardoso Lage, presidente da Comissão
de Coordenação e Desenvolvimento Regional do Norte (CCDR-N) de Portugal, afirmou que a rexión
"precisa dunha ben temperada emancipación política, á que a rexionalización dará
acceso, a pesar de considerar que, "infelizmente", o Norte de Portugal "non está en condicións
de estabelecer metas tan ambiciosas como as da veciña Galiza". Para Lage, as vantaxes de Galiza se
limitan a "unha economía española dinámica que puxa pola economía das súas
rexións e un goberno rexional electo e competente que coida da vida da rexión galega". (Fonte: vieiros.com).
Diáspora
Quintana ataca ao PSOE
O vicepresidente da Xunta e portavoz nacional
do BNG, Anxo Quintana, asegurou que o PSOE pretende "lavar a súa mala conciencia" coa proposta
de crear unha circunscrición electoral específica para os emigrantes, unha iniciativa que figurará
no programa socialista para as eleccións do 9 de marzo. Quintana defendeu que hai que decidir "con
urxencia" sobre o método de votación, para implantar o voto en urna, e "definir para que
eleccións poden votar e para cales non" os emigrantes.
(Fonte: Galiza Nación).
Turismo
Europa coñece a Compostela
O traballo da consultora belga Ramboll,
“Estudo sobre a realidade actual das peregrinacións a Santiago e as súas relacións co turismo”
considera que un 60% dos europeos coñece Compostela e que un 10% deles algunha vez visitou a capital galega.
Nesta orde, os países con maior coñecemento e visitantes a Compostela son Francia (77%), Italia (52%),
Alemaña (52%), e Gran Bretaña (39%).
(Fonte: El Correo Gallego).
|
| 28/01/2008 |
|
Galicia
Etiopía e China para adoptar
Segundo datos da vicepresidencia da Xunta,
un total de 509 solicitudes de adopción foron presentadas en Galicia no 2007, sendo China (120) e Etiopía
(190) os países preferidos polos galegos para adoptar. Colombia, Filipinas, Nepal, Ucraína, Rusia
e Kazakistán foron outros países seleccionados.
(Fonte: El Correo Gallego).
Solidariedade
Implicadas en India e Etiopía
A ONG galega “Implicadas no Desenvolvemento”
presentou en Lugo a súa planificación de proxectos que desenvolverán ata o 2012 en países
como Etiopía e India, así como descentralizar o voluntariado cara outras zoas de Galicia. (Fonte: La Voz de Galicia).
|
| 27/01/2008 |
|
Galicia
Mesas sobre o altermundo
O Seminario Galego de Educación
para a Paz (SGEP) e a Fundación Caixa Galicia, iniciaron un ciclo de sete mesas agrupadas en torno aos Diálogos
Altermondialistas, nas súas sede en Vigo e Santiago, coa participación de Ricardo Díaz Hochleitner,
presidente do Club de Roma; Carlos Rodrigues Brandao, activista do Foro Social Mundial; Rafael Badía, da
Oficina de Promoción para a Paz e os Dereitos Humanos da Generalitat de Catalunya; e Rafael Grasa, do Instituto
Catalán Internacional pola Paz. (Fonte:
El Correo Gallego).
México
Galegos demandan maior atención
Durante a súa participación
en Santiago no I Encontro de Empresarios Galegos en Rede, o presidente da Unión Mexicana de Empresarios
Galegos (UMEG), Antonio Cortés Ogando, demandou á Xunta “unha maior cercanía” cos entre 15.000
e 18.000 galegos dese país, paralela á que leva a cabo o goberno galego cos emigrados na Arxentina
e Uruguai. A UMEG conta con sesenta socios, especialmente empresarios galegos nos sectores turístico, construcción,
moblería e estacións de servicio.
(Fonte: El Correo Gallego).
Pesca
Formación galega en América
Central
A directora xeral de Cooperación
Exterior da Xunta, Fabiola Sotelo, presentou en El Salvador o programa de formación para pesca artesanal
en América Central, financiado para o 2008 con 316.500 euros. Sotelo presentou este programa ante os ministros
de Agricultura e Pesca dos países centroamericanos.
(Fonte: La Voz de Galicia).
|
| 26/01/2008 |
|
Marítima
Vigo como autopista do mar
Tomando como referencia os datos de actividade
portuaria de 2007, o presidente da Autoridade Portuaria de Vigo, José Paz, informou da firmeza da candidatura
de Vigo para liderar a primeira autopista europea do mar, en conexión cos portos franceses de Saint Nazaire
e Le Havre. O ano pasado, o porto vigués bateu o seu récord histórico con cinco millóns
de toneladas de mercancías. (Fonte:
El Correo Gallego).
Unión Europea-Galicia
“Alerta vermella” para o viño
galego
O sindicato Xóvenes Agricultores
(XXAA) advertiu de que a nova medida europea para crear plantacións sen dereito ao viñedo, prevista
para o 2018, provocará unha caída dos prezos da uva, afectando considerablemente ás Denominacións
de Orixe das Rías Baixas, en especial na zona do Salnés. Segundo XXAA, o patrimonio histórico
dos viticultores desta zona alcanza os 24 millóns de euros e 2.300 hectáreas. (Fonte: El Correo Gallego).
Unión Europea-Galicia
Culleredo busca fondos europeos
O concello de Culleredo formalizará
a presentación do seu proxecto Dínamo, destinado á súa mellora social e urbana, no
que pretende obter 3,1 millóns de euros en Fondos FEDER da Unión Europea, aos que poderá acceder
por vez primeira por ser un concello con poboación superior aos 20.000 habitantes. (Fonte: La Voz de Galicia).
|
| 25/01/2008 |
|
Galicia
Os irmandiños no Libro Guinness
O xogo de rol en vivo “Os irmandiños:
A revolta”, promovido pola Dirección Xeral de Xuventude da Vicepresidencia, entrou no Libro Guinness dos
récords como a actividade de xogo de rol en vivo con maior número de participantes en todo o mundo,
establecendo así unha nova categoría. O seu correspondente certificado foi recibido pola Dirección
Xeral de Xuventude. (Fonte: Galicia Hoxe).
Portugal
AECT para marzo
O Consello de Ministros do Goberno español
aprobou o decreto que senta as bases reguladoras para a creación de novos entes das denominadas Agrupacións
Europeas de Cooperación Territorial (AECT), entre rexións transfronteirizas, sendo o caso da Eurorrexión
Galicia-Norte de Portugal. Este decreto foi aprobado simultaneamente á celebración do XXIII Cumio
Hispano-Portugués de Braga e será presentado en Badaxoz a principios de febreiro, con motivo da celebración
do Programa Operativo de Cooperación Transfronteiriza Portugal-España 2007-2013, comezando a súa
andadura en marzo. (Fonte: Empresa y Finanzas).
|
| 24/01/2008 |
|
Unión Europea-Galicia
Queixo con denominación de orixe
O Diario Oficial da Unión Europea
anunciou que dentro de seis meses a Denominación de Orixe Protexida do queixo do Cebreiro, pasará
a formar parte das Denominacións de Orixe da UE. Deste xeito, se recoñece ao queixo en forma de seta
que se produce nos concellos lucenses de Baleira, Baralla, Becerreá, Castroverde, Cervanets, Folgoso do
Caurel, A Fonsagrada, Láncara, Navia de Suarna, As Nogais, Pedrafita de Cebreiro, Samos e Triacastela. (Fonte: La Voz de Galicia).
Cooperación
De Ourense a Polonia e Hungría
O Instituto Ourensán de Desenvolvemento
Económico (INORDE) acordou co Centro de Investigación en Xenética da Pataca en Polonia, o
Centro Georgikon en Hungría e ao Instituto Politécnico de Viana do Castelo en Portugal, un convenio
de colaboración en proxectos de investigación e desenvolvemento do sector da pataca para o estudo
de novas variedades melloradas. (Fonte:
La Voz de Galicia).
Arxentina
Apoian ampliar o Museo da Emigración
O presidente da Deputación de A
Coruña, Salvador Fernández Moreda, asinou un convenio para ampliar o Museo da Emigración Galega
en Arxentina (MEGA), proxecto que conta co apoio da Federación de Asociacións Galegas da República
Arxentina. A achega da deputación coruñesa será de 12.000 euros. (Fonte: El Correo Gallego).
Portugal
Sanxenxo promóvese en Lisboa
O concello de Sanxenxo participou na Bolsa
de Turismo de Lisboa, onde 4.600 persoas se interesaron pola súa promoción, sendo Portugal a principal
praza de interese para o turismo desta vila galega. As visitas ao stand de Sanxenxo experimentaron un aumento do
22% con respecto a 2007. (Fonte: La Voz
de Galicia).
Diáspora
Santa Comba homenaxea a Brasil
O concello de Santa Comba lembrará
aos xalleiros emigrados a este país sudamericano, cunha homenaxe titulada “Lembranza do emigrante: música
e poesía”, con presenza de figuras da emigración a Río de Xaneiro. (Fonte: La Voz de Galicia).
Francia
Vigo e Brest únense polo mar
Vigo e Galicia estarán presentes
nas próximas festas marítimas da localidade de Brest, na Bretaña francesa. A mediados de xullo
de 2008 se celebrará a Festa do Mar e dos Mariñeiros de Brest, que se reúne cada catro anos
desde 1992. (Fonte: La Voz de Galicia).
Irlanda
Rescatados mariñeiros galegos
Un total de 18 mariñeiros pertencentes
á tripulación do pesqueiro “Royalist”, con bandeira británica pero base en A Coruña,
foron rescatados nas augas xurisdiccionais irlandesas, a 370 km do condado de Clare, ao oeste da illa, por parte
da embarcación francés “Damafram”.
(Fonte: El Correo Gallego).
|
| 23/01/2008 |
|
Alemaña
Vigo promove o seu turismo
O concelleiro de Turismo e tenente de
alcalde vigués, Santiago Domínguez (BNG) participou na Feira Boot e Düsseldorf, a fin de promover
o turismo feiral de Vigo no sector da náutica recreativa e deportiva, especialmente con eventos como Desafío
Atlántico de Grandes Veleiros que organizará Vigo nos próximos meses, ou citas como o Brest
2008, que se realiza na Bretaña francesa e que nesta edición conta con Galicia como invitado especial. (Fonte: Faro de Vigo).
Portugal
“Portugués para nós”
A dirección xeral de Xuventude
e Solidariedade da Vicepresidencia da Xunta organizou o curso de portugués on line “Portugués para
Nós”, coa pretensión de fomentar o coñecemento deste idioma entre a mocidade galega. (Fonte: xornal.com).
Inmigración
Aumentan os afiliados á Seguridade
Social
En decembro de 2007, o número medio
de afiliados estranxeiros á Seguridade Social en Galicia ascendeu a 41.091 persoas, un crecemento interanual
do 21,3%. (Fonte: xornal.com).
|
| 22/01/2008 |
|
Arxentina
Compromiso coa emigración
O presidente da Deputación de A
Coruña, Salvador Fernández Moreda, comezou a súa visita por Arxentina, orientada a subscribir
acordos por valor de 108.000 euros en asistencia aos colectivos galegos neste país sudamericano. Neste sentido,
Fernández Moreda entrevistouse co presidente do Centro de Pensionados e Xubilados da República Arxentina,
Perfecto Marcote. (Fonte: La Voz de Galicia).
Galicia
Lugo e o mutismo da UNESCO
A Xunta e o concello lucense manteñen
o silencio sobre os plans de construcción do novo auditorio de Lugo, tomando en conta que a UNESCO segue
sen dar a coñecer a súa decisión sobre a construcción dun novo centro cultural no antigo
cuartel de San Fernando. (Fonte: La Voz
de Galicia).
Diáspora
Trece proxectos empresariais
No marco do I Encontro de Empresarios
Galegos en Rede en Santiago, inaugurado polo presidente da Xunta, Emilio Pérez Touriño, acordouse
o financiamento de trece proxectos empresariais en Uruguai e Arxentina, relativos ás novas tecnoloxías
en vivendas, material automobilístico, editoriais, inmobiliarias e agricultura. O encontro reuniu a 332
empresas de países como Arxentina, Uruguai, Venezuela, México, Costa Rica, Brasil, República
Dominicana, Portugal, Alemaña, Reino Unido, China e Xapón, polo que o presidente Touriño instou
aos participantes a aumentar os investimentos e o comercio e a constituír definitivamente un lobby empresarial
galego no mundo. (Fonte: Faro de Vigo e
El Correo Gallego).
Unión Europea-Galicia
Exposición da lingua galega
Con motivo da celebración do Ano
Internacional das Linguas, declarado pola UNESCO para este 2008, e da celebración do Ano do Diálogo
Intercultural promovido pola Comisión Europea, a Xunta de Galicia levará a Bruxelas, no último
trimestre deste ano, unha exposición interactiva para presentar a lingua galega. A secretaria xeral de Política
Lingüística, Marisol López, presentoulle o proxecto ao comisario europeo de Multilingüismo,
o romanés Leonard Orban, no encontro que mantiveron na sede da Comisión Europea. (Fonte: xornal.com e AGN).
EEUU
A miscelánea de A Estrada
A obra “A Estrada, Miscelánea Histórica
e Cultural”, editada polo concello estradense, poderá exhibirse na biblioteca do Congreso dos EEUU en Washington
e no centro estradense de La Habana, así como na Escola Española de Historia e Arquitectura de Roma
e medio cento de institucións e entidades.
(Fonte: El Correo Gallego).
|
| 21/01/2008 |
|
Galicia
Creado o “lobby” empresarial
Santiago inaugurou o I Encontro de Empresarios
Galegos en Rede, organismo creado pola consellería de Innovación e Industria, o Instituto Galego
de Promoción Económica (IGAPE), o Consello Galego de Cámaras de Comercio, a Confederación
de Empresarios de Galicia, a Fundación Galicia Emigración e as Asociacións de Empresarios
de Orixe Galega no Exterior, coa finalidade de concretar un lobby empresarial galego no exterior. Neste sentido,
a capital galega reuniu a 300 empresarios galegos dende países como Arxentina, Brasil, México, Uruguai,
Venezuela, República Dominicana e Suíza, así como de comunidades autonómas como Madrid
e Cataluña. (Fonte: Faro de Vigo).
Unión Europea-Galicia
Espazo para o galego
A secretaria xeral de Política
Lingüística, Marisol López, reuniuse en Bruxelas co comisario europeo de Multilingüismo,
Leonard Orban, a fin de abrir unha vía de colaboración directa da Xunta co comisario europeo para
achegarlle suxestións e participar activamente na nova estratexia de multilingüismo que se vai poñer
en marcha na Unión Europea na segunda metade deste ano, destinada a fomentar a aprendizaxe de idiomas para
favorecer o diálogo intercultural.
(Fonte: xornal.com).
Marítima
Galicia na feira de Brest
A nosa Comunidade foi invitada a participar
na feira marítima de Brest, que reúne cada catro anos nesta localidade francesa a milleiros de barcos
e mariñeiros de diversos países.
(Fonte: El Correo Gallego).
|
| 20/01/2008 |
|
Portugal
Infraestruturas transfronteirizas
O presidente da Xunta, Emilio Pérez
Touriño, representou ás comunidades autónomas fronteirizas entre Galicia e Portugal no XXIII
Cumio entre España e Portugal celebrado en Braga. Touriño incidiu na necesidade de cumprir cos compromisos
adquiridos noutros cumios sobre o AVE Vigo-Porto para o 2013.
(Fonte: La Voz de Galicia).
Turismo
Promoción nos países bálticos
Unha delegación da consellería
de Innovación e Industria, dirixida polo director xeral de Turismo Rubén Lois, e o xerente de Turgalicia,
Xesús Pereira, visitou Letonia, Lituania e Estonia para promover a gastronomía galega e o Camiño
de Santiago. (Fonte: La Voz de Galicia).
Cuba
Galicia na Feira da Habana
O vicepresidente da Xunta, Anxo Quintana,
reivindicou a importancia da presencia de Galiza como país convidado na Feira Internacional do Libro da
Habana por significar “a presenza dunha nación con cultura propia nun foro internacional”. Neste acto, que
tamén contou coa participación da conselleira de Cultura, Ánxela Bugallo, confirmouse a presencia
de 40 escritores, entre eles Suso de Toro, Manuel Rivas ou Teresa Moure, historiadores, editores e creadores de
toda índole, como Nélida Piñón, Ramón Villares, Ignacio Ramonet, Marful, a Real
Filharmonía de Galicia, Carlos Núñez, Miguelanxo Prado, Mercedes Peón, Abe Rábade
e o propio cantante cubano Pablo Milanés acompañado de cantantes galegos. (Fonte: Galiza Nación).
|
| 19/01/2008 |
|
Galicia
A importancia exterior do Instituto de
Medicina Legal
O Instituto de Medicina Legal da USC dirixido
polo doutor Ángel Carracedo, está considerado como o terceiro instituto mundial en publicacións
científicas e investigacións criminais, por detrás do FBI estadounidense e o británico
Forense Science Service. Neste sentido, o instituto recibe solicitudes de cooperación e asesoramento de
mais de 30 países, como Grecia, Gran Bretaña ou EEUU. Recentemente, este instituto logrou identificar
o ADN do neno colombiano Emmanuel, fillo da política colombiana Clara Rojas, secuestrada pola guerrilla
das FARC e liberada a principios de xaneiro.
(Fonte: La Voz de Galicia).
Galicia
A referencia do Erasmus
Nos derradeiros dez anos, o número
de universitarios galegos que optaron pola bolsa de estudios europea Sócrates-Erasmus triplicouse dos 366
estudiantes no curso 1997-98 a 1.448 na actualidade. Neste sentido, este programa convertese no referente para
os estudiantes galegos para acceder ao coñecemento doutros países europeos. (Fonte: La Voz de Galicia).
Inmigración
Estranxeiros frean a caída demográfica
Segundo o derradeiro padrón de
poboación do 1 de xaneiro de 2007, realizado polo Instituto Nacional de Estatística, en Galicia están
empadroados un total de 7.686 inmigrantes, permitindo un crecemento de 0,18% na poboación galega. Seguindo
con estes datos, se calcula en 9.500 o número de estranxeiros indocumentados e ilegais en Galicia. (Fonte: El Correo Gallego).
Portugal
Critican a tardanza do AVE Vigo-Porto
O PPdG criticou o retraso na construcción
do AVE entre Vigo e Porto, por privar á eurorrexión Galicia-Norte de Portugal dun volume de negocio
estimado en 17.000 millóns de euros anuais.
(Fonte: La Voz de Galicia).
Unión Europea-Galicia
Programa de vivendas europeo
Santiago liderará un programa europeo
de proxectos de vivendas, xunto a un grupo de cidades europeas, tras ser aprobado por un colexio de arquitectos
do noroeste peninsular e ser promovido pola alcaldía de Nantes.
(Fonte: El Correo Gallego).
|
| 18/01/2008 |
|
Economía
“Colapso” dos investimentos externos
O presidente do PPdG, Alberto Núñez
Feijoo, arremeteu en Ourense contra a política económica do goberno socialista, ao cualificar de
“colapso” e “descenso brutal” a situación dos investimentos estranxeiros en Galicia e España. Feijoo
asegurou que no 2004, os investimentos exteriores en Galicia correspondían ao 4,4% do total a nivel estatal
e que, no 2007, este índice está no 0,27%.
(Fonte: El Correo Gallego).
Inmigración
Un 10% de aumento
Os concellos galegos incrementaron nun
10% a súa poboación inmigrante no 2007, principalmente ante a chegada de cidadáns procedentes
de países como Perú, Paraguai, Bolivia, Brasil, Portugal e Romanía. Todos eles suman case
60.000 dos 81.442 cidadáns estranxeiros que, a 1 de xaneiro de 2007, estaban contabilizados no Instituto
Nacional de Estatística. (Fonte:
La Voz de Galicia).
Arxentina
Marisol Soneira en campaña
A deputada galega polo PSOE e secretaria
de Movementos Migratorios chegou a Arxentina para iniciar a precampaña das Eleccións Xerais do próximo
9 de marzo. Soneira estivo tamén en Venezuela e Brasil e, posteriormente, finalizará a súa
xira en Uruguai. (Fonte: La Voz de Galicia).
Unión Europea-Pesca
O experto López Veiga
O ex eurodeputado e ex conselleiro de
Pesca, Enrique López Veiga, formará parte dun grupo de expertos en materia pesqueira en Bruxelas,
destinado a redefinir o futuro da política pesqueira comunitaria.
(Fonte: El Correo Gallego).
Portugal
Feira atlántica en Vigo
A feira FranquiAtlántico que terá
lugar a principios de marzo en Vigo presentouse como o auténtico “motor” da economía galega e do
norte de Portugal, a fin tamén de converter a Vigo no seu referente no norte peninsular. (Fonte: El Correo Gallego).
Portugal
Decreto para a Agrupación de Cooperación
Territorial
O presidente da Xunta, Emilio Pérez
Touriño, anunciou que o Consello de Ministros aprobará o decreto que posibilitará a creación
da Agrupación Europea de Cooperación Territorial entre Galicia e o Norte de Portugal, tras ser aprobado
recentemente por parte do goberno portugués. A Agrupación de Cooperación Territorial entre
Galicia e o Norte de Portugal dotará de “personalidade xurídica a eurorrexión". (Fonte: xornal.com e Vieiros).
Cuba
Unidos pola narración
Segundo anunciou a concelleira de Cultura
de Pontevedra, Lola Dopico, no 2008 Galicia e Cuba estarán unidos "por contos e narracións",
tras inaugurar a novena edición do Salón do Libro Infantil e Xuvenil de Pontevedra, na que o país
caribeño é o convidado como anticipo do que será a presenza de Galicia na vindeira Feira do
Libro de La Habana a celebrarse en febreiro.
(Fonte: Faro de Vigo).
Cooperación
Programas cara América Latina
O Centro Europeo de Empresas e Innovación
de Galicia, BIC Galicia, está a transferir as súas metodoloxías e ferramentas en materia de
emprendemento a entidades de México, Venezuela e Colombia, no marco de iniciativas de cooperación
internacional impulsadas pola Comisión Europea e pola Axencia Española de Cooperación Internacional
(AECI). (Fonte: xornal.com).
|
| 17/01/2008 |
|
Diáspora
O modelo emigrante do PPdG
O voceiro parlamentario de Emigración
polo BNG, Iago Tabarés, invitou ao presidente do PPdG, Alberto Núñez Feijoo, a presentar a
súa proposta do voto emigrante “en lugar de viaxar a Brasil e realizar promesas electorais”. Dende a localidade
brasileira de Salvador de Baía, Núñez Feijoo defendeu o voto en urna para os emigrantes e
instou a que Baía sexa o lugar onde “Galicia pase da emigración dos anos sesenta e setenta ao investimento
do 2010”. (Fonte: El Correo Gallego e La
Voz de Galicia).
Diáspora
Máis de 1.400 emigrantes atendidos
A Secretaría Xeral de Emigración
destinará no 2008 máis de 200.000 euros á aplicación experimental da Lei de Dependencia
no exterior para custear actuacións de axuda domiciliaria. No 2007, atendeuse a 1.408 persoas en situación
de dependencia. Por países, Cuba foi receptora de 938 axudas, Arxentina de 284, Uruguai de 119, Venezuela
de 39 e Brasil de 28. Paralelamente, ao longo de 2008 consolidarase a rede de centros de día, segundo as
previsións feitas en coordinación coas agregadurías laborais, a Delegación da Xunta
en Bos Aires e as institucións que desenvolven os programas.
(Fonte: xornal.com).
Cooperación
Impulso turístico en Sri Lanka
Como parte dun programa da ONU, o Centro
Superior de Hostalería de Galicia porá en marcha unha escola na localidade de Koggala, ao sur de
Sri Lanka, para a mellora do turismo neste país asiático.
(Fonte: El Correo Gallego).
Cuba
Proxectos de Cooperación
A Dirección Xeral de Cooperación
Exterior da Xunta destinará 472.735 euros a dous proxectos que se desenvolven en aplicación do convenio
marco de cooperación entre Cuba e Galicia asinado en decembro de 2007. No primeiro programa, se destinarán
200.000 euros para o melloramento de infraestruturas públicas e vivendas e un programa de educación
e sensibilización medioambiental na comunidade Antonio Maceo, en Santiago de Cuba, en colaboración
coa Sociedade Cubana para a Promoción das Fontes Renovables de Enerxía e Respecto Ambiental (Cubasolar)
e co Ministerio para la Inversión Extranjera y la Colaboración Económica de Cuba (MINVEC).
No segundo proxecto se destinarán 272.735 euros para a mellora das condicións de habitabilidade de
vivendas no centro histórico de Santiago de Cuba, nun proxecto no que colabora o Fondo Galego de Cooperación
e Solidariedade. (Fonte: xornal.com).
México
Mouriño, ministro de Interior
Juan Camilo Mouriño, fillo do presidente
do Celta de Vigo, Carlos Mouriño, foi nomeado polo presidente mexicano Felipe Calderón como novo
Secretario da Gobernación, cargo equivalente ao de ministro de Interior. Nado en Madrid en 1971, licenciado
en Económicas e nacionalizado mexicano aos 18 anos, Juan Camilo Mouriño é considerado como
a “man dereita” do actual presidente mexicano, desde o seu cargo de xefe da Oficina da Presidencia. (Fonte: Faro de Vigo).
|
| 16/01/2008 |
|
Economía
Demanda de Zara en Turquía
A empresa do grupo Inditex levou aos tribunais
en Turquía a diversos establecementos que utilizan o seu nome. A empresa de Amancio Ortega está demandando
a establecementos con nomes como Zara Lens, Zara ZarAccom, Zaranism, Zarakol, que existen tanto na rexión
de Anatolia central como en Istambul. (Fonte:
xornal.com).
Cultura
Literatura galega no País de Gales
A secretaria xeral de Política
Lingüística, Marisol López, presentou o novo programa de estadías de escritoras e escritores
galegos en Gales promovido polo Centro de Estudos Galegos de Gales. A iniciativa consiste na residencia dun autor
galego na cidade galesa de Bangor co obxectivo de facer achegas académicas e creativas ao programa de estudos
de galego daquela universidade, que mantén un convenio coa Secretaría Xeral de Política Lingüística.
Con este proxecto tamén se pretende aumentar a visibilidade e a presenza das voces literarias galegas no
contexto galés, británico e internacional.
(Fonte: xornal.com).
Portugal
Posgrao transfronteirizo
A Universidade de Vigo asinou en Porto
un proxecto de desenvolvemento dun posgrao universitario transfronteirizo ao que se sumarán as universidades
de Santiago, A Coruña, Aveiro, Porto e Miño. O proxecto foi asinado pola conselleira de Educación
da Xunta, Laura Sánchez Piñón, e o ministro portugués de Ciencia e Tecnoloxía,
José Mariano Gago. (Fonte: La Voz
de Galicia).
|
| 15/01/2008 |
|
Brasil
Feijoo critica a Touriño
O presidente do PPdG, Alberto Núñez
Feijoo, acusou ao presidente da Xunta, Emilio Pérez Touriño, de “substituír a promesa incumprida
por outra que non vai a cumprir”, en referencia á promesa de “falsa nacionalidade” para a emigración
e o voto en urna. Feijoo comparou a Touriño co mandatario brasileiro Lula da Silva ao considerar que o presidente
da Xunta posúe un número de asesores similar ao mandatario brasileiro, “coa diferencia entre Brasil
e Galicia de 187 millóns de habitantes”.
(Fonte: La Voz de Galicia).
Portugal
Piden expansión hostaleira
Reunidos en Baiona, os novos clientes
dos hoteis, restaurantes e apartamentos da provincia de Pontevedra, así como os empresarios locais, pediron
unha maior promoción en Portugal das vantaxes turísticas e deste sector na provincia pontevedresa.
No 2007, Portugal aportou 1,8 millóns de visitantes á provincia de Pontevedra, dun total dos 2,8
millóns recibidos. (Fonte: La Voz
de Galicia).
Unión Europea-Galicia
Fondos para o AVE Vigo-Porto
O comisario de Transportes e vicepresidente
da Comisión Europea, Jacques Barrot, e o presidente do Banco Europeo de Investimentos (BEI), Philippe Maystadt,
acordaron crear un fondo de mil millóns de euros para garantir os préstamos privados necesarios para
sufragar os proxectos previstos para a Rede Transeuropea de Transporte (RTT), no que se inclúe o AVE entre
Vigo e Porto. A Comisión Europea valora a necesidade desta infraestrutura de transporte para un mercado
rexional de 300.000 millóns de euros entre Galicia e o Norte de Portugal. (Fonte: La Voz de Galicia).
Cultura
Galicia, como Escocia
O reporteiro da BBC David Miller, comparou
no artigo Europe gets smaller as EU grows (Europe vólvese pequena namentres que a UE medra) a situación
política de Escocia coa de Galicia, durante unha viaxe pola nosa Comunidade. "Os galegos considéranse
unha raza aparte. Son primeiro galegos e españois despois. Sóalles familiar?", escribe Miller
nun artigo no que considera que "Escocia non é o único país europeo que está a
debater o seu futuro constitucional".
(Fonte: Vieiros).
Cuba
Patrimonio con Compostela
O Colexio de Oficial de Arquitectos de
Galicia (COAG) e o responsable da Oficina de Conservación de Santiago de Cuba, Omar López, estreitaron
en Santiago os seus respectivos lazos para promover a revitalización urbana das súas cidades históricas.
Esta iniciativa ten como título “Santiago de Cuba, unha alternativa de futuro”. (Fonte: El Correo Gallego).
|
| 14/01/2008 |
|
Cuba
Ollada á arquitectura cubana
Omar López, conservador oficial
de Santiago de Cuba, pronunciou en Compostela unha charla sobre a situación da arquitectura cubana e os
resultados do convenio de cooperación entre os colexios de arquitectos de Compostela e Cuba asinado en outubro
de 2007. López é o artífice do nomeamento dos cafetais de Sierra Maestra como Patrimonio da
Humanidade. (Fonte: El Correo Gallego).
Galicia
Denuncia baixa de investimentos exteriores
O PPdG denunciou unha substantiva baixa
nos investimentos estranxeiros en Galicia, de 391 millóns de euros durante os anos de goberno do PPdG na
Xunta ata os 18 millóns de euros do actual goberno bipartito, entre xaneiro e setembro de 2007. Tamén
denunciou a fuga de empresas galegas a Portugal.
(Fonte: El Correo Gallego).
Arxentina
O impacto da crise enerxética
Diversos membros da comunidade galega
radicada en Bos Aires declararon o seu malestar pola dramática situación dos cortes de luz e a escaseza
de carburante que sufre o país sudamericano, co seus efectos na vida cotiá. (Fonte: La Voz de Galicia).
|
| 13/01/2008 |
|
Diáspora
En marcha o lobby empresarial
O Instituto Galego de Promoción
Económica (IGAPE), a Fundación Galicia Emigración, ás Asociacións de Empresarios
de Orixe Galega no Exterior, a Confederación de Empresarios de Galicia e o Consello Galego de Cámaras
de Comercio, organizarán entre o 21 e 25 de xaneiro en Santiago o I Encontro de Empresarios Galegos en Rede,
no que participarán 200 empresarios galegos e os seus responsables por país, sendo Jesús Caneda
(Brasil), Rafael Osvaldo Méndez (Arxentina), Antonio Cortés (México), César Antelo
(Uruguai), Cándido Rodríguez Losada (Venezuela), Eduardo Pahíño (República Dominicana)
e José Aser Castillo (Portugal). Tamén participarán Julio Fernández polos empresarios
galegos de Cataluña e Francisco Pal Pardo por Madrid.
(Fonte: El Correo Gallego).
Economía
Incremento lácteo no exterior
Durante os primeiros nove meses de 2007,
Galicia aumentou as súas vendas do sector lácteo ao exterior nun 130,7%, cunha facturación
de 93,2 millóns de euros. Francia, Portugal, Bélxica, Países Baixos, Reino Unido, Gabón,
Guinea Ecuatorial, Camerún, Congo, Líbano, Chipre, Andorra, Polonia e a Polinesia francesa foron
os principais socios comerciais. (Fonte:
El Correo Gallego).
Unión Europea-Galicia
Reinserción laboral
Unhas 250 persoas lograrán a súa
reinserción laboral mediante un programa que a Deputación de Pontevedra presentará ante o
Fondo Social Europeo e que prevé a formación profesional de máis de 400 traballadores. Os
proxectos son denominados Aquelando 2 e Arelar.
(Fonte: La Voz de Galicia).
|
| 12/01/2008 |
|
Portugal
Conexión enerxética
De visita en Ferrol, o ministro de Industria
Joan Clos asegurou que Galicia servirá de mediadora entre España e Portugal para levar a cabo os
proxectos de integración enerxética previstos para os próximos anos, con especial énfase
na electricidade, o gas e a enerxía eólica.
(Fonte: El Correo Gallego).
Diáspora
Medra o censo electoral exterior
Un total de 30.166 galegos no exterior
inscribíronse no censo electoral de residentes ausentes (CERA) entre o 1 de decembro de 2003 e o 1 de decembro
de 2007, o último censo validado polo Instituto Nacional de Estatística. Isto permite a Galicia constituírse
na comunidade autónoma onde máis medrou a súa lista de votantes no estranxeiro para as próximas
eleccións xerais do 9 de marzo de 2008. Se engadimos os emigrantes inscritos no mesmo censo nos derradeiros
catro anos, Galicia suma 324.388 residentes no exterior con dereito ao voto, un 14,1% do censo total a nivel estatal. (Fonte: La Voz de Galicia).
|
| 11/01/2008 |
|
Inmigración
Aumentan inmigrantes no Barbanza
Case o 40% dos 1.600 inmigrantes empadroados
nos once concellos da comarca de Arousa Norte proceden de Marrocos, Portugal, Chile e Perú. Esta porcentaxe
aumenta tomando en consideración os catro concellos do Barbanza, onde a poboación procedente destas
nacionalidades é de 538 dos 1.237 estranxeiros residentes. Arxentina, Colombia, República Dominicana,
Filipinas, Romanía, EEUU, Bangladesh, Bostwana, Xordania, Kazajstán, Malí e Illas Mauricio
completan as nacionalidades de orixe dos inmigrantes nesta zona.
(Fonte: La Voz de Galicia).
Marítima
Parálise no Centro Naval vigués
Os obstáculos de Bruxelas para
colaborar con axudas económicas na construcción e reparación naval ameazan o futuro do Centro
de Reparación Naval de Vigo, tal e como recoñeceu o seu xerente e presidente da Cámara de
Comercio viguesa, José García Costas.
(Fonte: La Voz de Galicia).
Téxtil
Cara a internacionalización
A consellería de Innovación
e Industria destinará no 2008 un total de dous millóns de euros para promover e fomentar a internacionalización
das industrias galegas do téxtil, especialmente de cara a concretar a súa presenza nos mercados mais
competitivos a nivel internacional. (Fonte:
La Voz de Galicia).
Unión Europea-Galicia
A contaminación do río
Umia
Bruxelas recibiu o informe elaborado polo
goberno estatal sobre a contaminación do río Umia tralos vertidos ocasionados polo incendio da planta
química de Brenntag. Dende a Xunta sinalouse que o goberno galego non ten responsabilidade no dano ambiental
ocasionado pola contaminación do río.
(Fonte: El Correo Gallego).
|
| 10/01/2008 |
|
Defensa
Tercio Norte a Bosnia
O coronel Luís Feal informou que
unha trintena de soldados do Tercio Norte asentados en Ferrol formarán parte dunha misión da Unión
Europea en Bosnia, para cooperar en tarefas de control de seguridade.
(Fonte: La Voz de Galicia).
Pensamento
Galeano en galego
O escritor uruaguaio Eduardo Galeano publicará
en galego o seu próximo libro, unha colección de artigos periodísticos que editará
Laiovento o próximo mes de febreiro. Cartas ao señor futuro, título do libro, é unha
crítica contra as políticas neoliberais e os retrocesos nas conquistas da clase traballadora. (Fonte: Galicia Hoxe).
Sáhara
Afogados no Sáhara
O concello de Ordes mostrou unha exposición
do fotógrafo e xornalista galego Gabriel Tizón relativa ao campo de refuxiados saharauís de
Tinduf (Alxeria), traballo realizado en febreiro de 2006. A mostra leva por título “Afogados no Deserto”. (Fonte: La Voz de Galicia).
Colombia
Identifican o ADN de “Emmanuel”
O Instituto de Medicina Legal, dependente
da USC, confirmou que a identidade de Juan David Gómez Tapiero correspóndese coa de “Emmanuel”, o
fillo de Clara Rojas, secuestrada polas Forzas Armadas Revolucionarias de Colombia (FARC). A Fiscalía colombiana
foi notificada do resultado positivo da proba de ADN que realizou este laboratorio galego. (Fonte: Galiza Nación).
|
| 09/01/2008 |
|
Galicia
Bolsas Sócrates-Erasmus
A USC convocou a tramitación das
bolsas de estudos Sócrates-Erasmus, que beneficiarán a 1.600 alumnos para o próximo curso
universitario 2008-2009. (Fonte: El Correo
Gallego).
Galicia
Investigación galega na NASA
O concello de Ferrol outorgou o premio
“Ingeniero Comerma” á investigadora galega Sofía Martínez Vilariño, quen traballa en
Houston nun proxecto de investigación coa NASA para o melloramento da impermeabilidade dos tanques de combustible
dos transbordadores espaciais. (Fonte: La
Voz de Galicia).
Portugal
Denuncian acoso policial
A Asociación de Profesionais Españois
da Saúde en Portugal e centos de médicos e enfermeiros galegos que traballan en Portugal enviaron
unha carta ao presidente do goberno español, José Luís Rodríguez Zapatero, para que
defenda os seus dereitos e interceda ante o goberno portugués a fin de acabar cos “abusos” motivados polas
multas da Brigada Fiscal da Garda Nacional Republicana dos vehículos con matrícula española
que transitan por Portugal. (Fonte: Faro
de Vigo).
|
| 08/01/2008 |
|
Unión Europea-Galicia
Acción xudicial contra España
O comisario de Medio Ambiente, Stavros
Dimas, anunciou que a Comisión Europea "emprenderá inmediatamente as accións legais oportunas"
contra o Estado Español para "asegurar o cumprimento da lexislación comunitaria de medio ambiente"
logo de constatar que, máis dun ano despois do incendio na empresa química Brenntag, que provocou
a contaminación do río Umia, no seu paso por Caldas de Reis, o Executivo comunitario "aínda
non recibiu o informe do accidente que debían enviar as autoridades españolas". (Fonte: Galiza Nación).
Sáhara
Guerra contra Marrocos?
Ante a apertura da terceira rolda de negociacións
en Nova York entre Marrocos e a República Árabe Saharauí Democrática, o subdelegado
saharauí en Galicia, Mohamedu Haiba, declarou que “se non hai un cambio de actitude, habemos de ir á
guerra con Marrocos”. (Fonte: Vieiros).
Galicia
Música con Iberoamérica
A concellería de Cultura de Ortigueira
convocou o primeiro “Concurso Iberoamericano de Composición para Banda de Música Vila de Ortigueira”,
unha iniciativa dirixida por compositores de España e Portugal e países como Arxentina, Brasil, Canadá,
Colombia, Costa Rica, Cuba, Ecuador, Eslovenia, Uruguai e Venezuela.
(Fonte: La Voz de Galicia).
Inmigración
Críticas contra a Xunta
O Foro de Inmigración reclamou
a “inmediata apertura” da oficina municipal en Santiago de atención á poboación inmigrante
e emigrante retornada, debido aos retrasos na renovación do convenio co Concello e a secretaría xeral
de Emigración. Esta oficina se ocupa da situación dos 4.000 inmigrantes de Compostela. Pola súa
banda, a concellería de Benestar Social santiaguesa negou que esta oficina vaia a ser clausurada. (Fonte: La Voz de Galicia e El Correo Gallego).
|
| 07/01/2008 |
|
Inmigración
Aumenta o emprego inmigrante
No 2007, máis de 7.000 inmigrantes
se incorporaron ao mercado laboral galego, sendo 40.000 os estranxeiros que traballan na nosa Comunidade. Segundo
a consellería de Traballo, o número de afiliados estranxeiros á Seguridade Social galega supera
o 50%, mentres son 16.000 o número de emigrantes retornados neste mesmo período. (Fonte: El Correo Gallego).
Portugal
A atracción comercial de Vigo
Un total de 414.000 clientes de localidades
do norte de Portugal como Arcos de Valdevez, Braga, Caminha, Melgaço, Monçao, Paredes de Coura, Ponte
da Barca, Ponte de Lima, Valença do Minho, Viana do Castelo e Vila Nova de Cerveira utilizan Vigo como principal
referente comercial. Este efecto expansivo e comercial de Vigo permite idear unha área de expansión
para o comercio galego que se achega ata Porto.
(Fonte: La Voz de Galicia).
|
| 06/01/2008 |
|
Inmigración
Paliar a industria hostaleira
Ante o alarmante déficit en persoal
de hostalería, a Asociación Provincial de Empresarios de Hostalería de Lugo anunciou a apertura
dun proceso de selección de persoal no estranxeiro, a fin de propiciar a chegada de inmigrantes para traballar
neste sector. (Fonte: La Voz de Galicia).
|
| 05/01/2008 |
|
Inmigración
Sumamos Todos
O presidente da Xunta, Emilio Pérez
Touriño, anunciou en Vigo que destinará dous millóns de euros a través do programa
“Sumamos Todos” para labores de integración dos colectivos inmigrantes, que representan o 3% da poboación
en Galicia e o 4% en cidades como Vigo. Segundo datos da secretaría xeral de Emigración, en Galicia
existen máis de 81.000 empadroados estranxeiros, cun crecemento do 10% con respecto ao 2006. Así
mesmo, uns dez mil inmigrantes están escolarizados, con mil estranxeiros estudando nas tres universidades
galegas. (Fonte: El Correo Gallego e La
Voz de Galicia).
|
| 04/01/2008 |
|
Prestige
Recorrerán decisión en
Nova York
O goberno español recorrerá
a decisión dun tribunal federal estadounidense de desestimar a demanda interposta en 2003 polo Goberno español
contra a American Bureau of Shiping (ABS) por garantir o bo estado do petroleiro Prestige, só seis meses
antes de verter o seu contido a escasa distancia das costas de Galicia en novembro do 2002. Un comunicado do ministerio
de Xustiza considera que a resolución da xuíz Laura Swain, do distrito sur de Nova York, non é
firme e que contra ela caben recursos de "reconsideración" como de apelación. (Fonte: Galicia Hoxe).
Arxentina
Crean un Club de Economía
A delegada da Xunta en Arxentina, María
Xosé Porteiro, anunciou en Vigo a creación dun Club de Economía co obxectivo de establecer
un foro que fomente as relacións empresariais entre Galicia e Arxentina. (Fonte: Galicia Hoxe).
Inmigración
Esixen reapertura da oficina de atención
O Foro Galego de Inmigración entregará
mais de 200 sinaturas para esixir a reapertura da Oficina Municipal de Atención á Poboación
Inmigrante e Emigrante Retornada, a fin de atender as demandas destes colectivos. (Fonte: AGN).
|
| 03/01/2008 |
|
Turismo
Medra o turismo a Galicia
Segundo datos da Xunta, máis de
5,7 millóns de viaxeiros pasaron por Galicia no 2007, cun incremento do 8% con respecto ao 2006 e un 11%
comparado con 2005. En tanto turistas estranxeiros, os máis numerosos foron os portugueses, alemáns,
británicos, italianos e franceses.
(Fonte: La Voz de Galicia).
|
| 02/01/2008 |
|
Galicia
IGADI Annual Report 2007/2008
Como un esforzo por comprender os cambios
na política mundial dende unha perspectiva galega, o Instituto Galego de Análise e Documentación
Internacional (IGADI) publicou o “IGADI Annual Report 2007/2008”, onde se trazan as claves da política internacional
no 2007 e os eidos que deseñarán o mundo a partir do 2008.
(Fonte: Galiza Nación).
|
