|
 |
| 30/06/2005 |
|
Ambiente
Allariz na rede da Unesco
A reserva de biósfera da área
de Allariz, foi incluida na rede mundial da Unesco, “polos seus valores culturais e a utilización sostible
das terras para a conservación da flora e a fauna”.
(Fonte: El Correo Gallego).
Comunicación
Periodista palestiniana en Santiago
Dima Khatib, periodista palestiniana cun
alto cargo na cadea televisiva qatarí Al Jazeera, visitou a capital galega invitada pola Fundación
Araguaney, para explicar a función dos comunicadores nesta cadea e a súa experiencia en Iraq, Palestina
e o mundo árabe. (Fonte: El Correo
Gallego).
|
| 29/06/2005 |
|
Diáspora
Alarma por secuestro de empresario galego
en México
A pesar de que a familia de Avelino Manuel
Vázquez, ourensán de O Carballiño que fora secuestrado hai dous meses na capital mexicana,
xa pagara o rescate, o empresario aínda non fora liberado, polo que o seu caso aumenta a 11 os secuestros
de empresarios galegos desde 1998 no país azteca.
(Fonte: El Correo Gallego).
Turismo
Baixa o gasto turístico en Galicia
Os visitantes estranxeiros deixaron 272
millóns de euros entre xaneiro e maio de 2005, un 13% menos co respecto ao ano anterior, cunha media de
gasto de 1.162 euros, segundo cifras da Enquisa do Gasto Turístico do Ministerio de Industria. (Fonte: El Correo Gallego).
|
| 28/06/2005 |
|
Diáspora
Touriño presidente confirmado
polo voto emigrante
Tras 17 horas de tensión, o decisivo
voto emigrante na provincia de Pontevedra terminou confirmando ao candidato socialista Emilio Pérez Touriño
o disputado escano 38 que lle daría a maioría parlamentaria e abriría as portas da presidencia
da Xunta. O PSdG xa anunciara o comezo de negociacións para gobernar en coalición co BNG. (Fonte: El Correo Gallego).
Cultura
Cuba presente en Compostela
O mes de xullo terá unha apretada
axenda de exposicións, documentais, música, concertos, teatro, gastronomía, conferencias e
películas relativas á illa caribeña, como parte dunha iniciativa do Concello para dar a coñecer
a cultura cubana. Neste sentido, artistas cubanos e galegos traballarán na creación dun mural en
San Lázaro. (Fonte: El Correo Gallego).
|
| 26/06/2005 |
|
Diáspora
A xuntanza dos Galegos no Mundo
A Gran Xuntanza dos Galegos que se levou
a cabo en Barcelona, contou coa presenza de 150.000 visitantes no recinto do Forum e permitiu a concreción
dunha iniciativa para crear un lobby empresarial galego, que contou con pleno apoio da Xunta de Galicia e as representacións
empresariais de galegos da diáspora.
(Fonte: El Correo Gallego).
Inmigración
Colombianos piden axuda pola nena asasinada
Un colectivo de inmigrantes colombianos
de Ferrol pediu á comunidade ferrolá un maior apoio financeiro para a familia da nena colombiana
Natalia, presuntamente violada e asasinada pola súa nai e a súa parella. (Fonte: El Correo Gallego).
Baixa o peso laboral inmigrante
Segundo a Federación Nacional de
Traballadores Autónomos, Galicia ocupa o oitavo posto en canto ao número dos novos autónomos
inmigrantes. (Fonte: El Correo Gallego).
|
| 25/06/2005 |
|
Diáspora-Eleccións
Fraga pide mediación de Fidel
Castro
Ante a polémica polo retraso dos
votos emigrantes desde Venezuela, o presidente da Xunta pediu ao mandatario cubano a súa intercesión
ante o presidente venezuelano Hugo Chávez, para axilizar o envío dos votos emitidos polos emigrantes
galegos no país suramericano. Pola súa banda, a vicepresidenta María Teresa Fernández
de la Vega, cualificou de “inaceptables e inxustificadas” as insinuacións polo retraso das sacas desde Caracas. (Fonte: El Correo Gallego).
Unión Europea-Cultura
Cumio do Premio Europa
Santiago recibiu a 175 altos representantes
da UE, ademais do secretario xeral do Consello de Europa, para a celebración do 50º aniversario do
Premio Europa. (Fonte: El Correo Gallego).
|
| 24/06/2005 |
|
Diáspora-Eleccións
Venezuela envía o 33% das papeletas
Para rematar coa preocupación no
PP e no BNG sobre a situación dos votos emigrantes de Venezuela, fontes da empresa estatal de correos Ipostel
aseguraron o envío a Galicia de 12.000 papeletas. O PSdG afirmou que dende o país suramericano xa
se recibiron o 33,8% do censo electoral dese país.
(Fonte: La Voz de Galicia e www.xornal.com).
Téxtil
Inditex prepara a súa expansión
asiática
O grupo téxtil galego comezará
o próximo ano un programa de apertura de tendas en Asia para achegarse aos 109 establecementos no 2009.
Na actualidade conta con 16 tendas e espera incrementar a presenza en Thailandia, Xapón, Hong Kong, Corea
do Sur, Taiwán, e Indonesia, ademais de abrir nas principais cidades chinesas: Shanghai e Beijing. (Fonte: El Correo Gallego).
Sociedade
A Coruña, capital da cartografía
O Palacio de Congresos coruñés
Palexco organizará en xullo un cumio internacional de cartografía, no que participará o astronauta
español Pedro Duque como representante da Axencia Europea do Espacio. (Fonte: El Correo Gallego).
Unión Europea-Ambiente
Proxecto europeo para Galicia
O proxecto medioambiental Interreg III
Atlantic Area, tamén coñecido como Eurocips e destinado a reducir o impacto dos accidentes marítimos,
poderá aplicarse en Galicia coa participación da Consellería de Emigración, o equipo
de Meteogalicia e a USC. (Fonte: El Correo
Gallego).
|
| 23/06/2005 |
|
Diáspora-Eleccións
A polémica polo voto emigrante
Ante os recentes cuestionamentos sobre
o voto exterior, o cónsul venezuelano en Vigo, Víctor Croquet, explicou que non recibiu ningunha
queixa por parte dos partidos galegos sobre a colectividade en Venezuela. Pola súa banda, o BNG solicitou
por escrito á Xunta Electoral Central que tódolos sobres con sufraxio da diáspora se reconten
por separado. A Galicia chegaron 122.000 votos do exterior, principalmente de Suíza, EEUU, Francia e Alemaña. (Fonte: La Voz de Galicia e www.xornal.com).
Diáspora
Reencontros con América Latina
No marco do programa “Reencontros en Familia”
promovido pola Consellería de Emigración, un grupo de cincoenta emigrantes galegos chegaron a Santiago
provenientes de Brasil e Cuba. Anteriormente se recibiran a 18 venezuelanos, e outros uruguaios e arxentinos. En
total, este ano, o programa recibirá a 250 galegos emigrantes de América Latina. Segundo datos do
ministerio de Traballo, Galicia é, despois de Madrid ,a comunidade que recibe mais retornados, en total
6.922 no 2004. (Fonte: El Correo Gallego).
Economía
Temor aos bazares chineses
Segundo o presidente da Federación
Galega de Comercio, José María Seija López, a proliferación de bazares chineses en
Galicia “forma parte dunha grande organización” que conta coa plataforma necesaria para desembarcar os seus
productos de baixo custe. As pemes galegas acusan de competencia desleal aos case mil bazares chineses que existen
na Comunidade. (Fonte: El Correo Gallego).
Unión Europea-Fondos Estructurais
Galicia mellora execución dos
Feder
Segundo o conselleiro en funcións
de Economía e Facenda, Xosé Antonio Orza, a execución financeira dos Feder ou fondos europeos
na nosa Comunidade no 2004 superou o 100% das previsións de gasto, cun crecemento do PIB tres décimas
superior ao resto da península e 1,2 puntos das economías da eurozona. Sen embargo, Orza afirmou
que o PIB galego se emprazou no 74,7% da media comunitaria, polo tanto por debaixo do necesario para continuar
recibindo os fondos estruturais. (Fonte:
El Correo Gallego).
Unión Europea-Ambiente
O Congreso aproba iniciativa pola Rede
Natura 2000
A petición da deputada polo PP
ourensán, Ana Belén Vázquez, o Congreso dos Deputados aprobou unha reclamación ante
Bruxelas para o financiamento e conservación dos espacios naturais incluídos na Rede Natura 2000,
nos que se benefician as localidades ourensás do Xurés, Invernadoiro, Serra da Lastra e Peña
Trevinca, entre outros. (Fonte: La Voz de
Galicia).
Cultura
Bugallo presenta programa do Premio Europa
O alcalde compostelán, Xosé
Sánchez Bugallo, presentou ante o Parlamento europeo en Estrasburgo, e por invitación do presidente
da Asemblea Parlamentaria do Consello de Europa, René van der Linden, o programa de actos da asemblea do
grupo de cidades Premio Europa, que celebrará o seu cincuentenario en xullo en Santiago. (Fonte: La Voz de Galicia).
Portugal
Suxiren crear en Braga un porto privado
Empresarios de Vigo e o norte de Portugal
avanzan nunha proposta para axilizar o intercambio de productos entre os peiraos de Guixar e Leixoes, centrada
na posibilidade de desenvolver un porto seco privado no entorno de Braga e o tecido industrial de Ponte de Lima
e Viana do Castelo, para a redistribución posterior das mercancías. (Fonte: La Voz de Galicia).
|
| 22/06/2005 |
|
Diáspora-Eleccións
A trascendencia do voto exterior
Diversos representantes dos partidos galegos
alertaron sobre as posibles consecuencias do decisivo voto exterior nas eleccións galegas. A responsable
de Emigración do BNG, Ana Miranda, alertou de posibles “actitudes xenófobas” dende o PP no caso de
que o voto emigrante non lle sexa favorable. Dirixentes de outros partidos critican a posibilidade de que o futuro
de Galicia o decida a emigración.
(Fonte: El Correo Gallego).
Eixo Atlántico
A promoción das Vías Atlánticas
O proxecto Vías Atlánticas,
financiado polo programa europeo Interreg III, será discutido polos representantes das cidades españolas
e portuguesas que participan no proxecto. Este inclúe a revalorización das calzadas romanas XIX e
XX do itinerario de Antonino entre Braga, Astorga e Lugo.
(Fonte: La Voz de Galicia).
Unión Europea-Pesca
Flota galega envellece sen axudas europeas
Os armadores galegos advirten que a flota
pesqueira está envellecendo pola falta de axudas dende Bruxelas, xa que esta só contempla a artesanal.
A alerta provén das posicións diverxentes dos ministros de Pesca da UE sobre a construción
de novas unidades para o período 2007-2013, e ante a imposibilidade de alcanzar un acordo sobre o Fondo
Europeo da Pesca. Os armadores vigueses informaron da necesidade de renovación dun 25% da flota. (Fonte: Faro de Vigo).
Sociedade
Investigación galega publicada
en EEUU
Unha investigación desenvolvida
por un equipo multidisciplinar de reumatólogos, médicos de familia e epidemiólogos do hospital
vigués de Meixoeiro, será publicada pola revista médica norteamericana “Arthritis an Rheumatism.
Arthritis Care and Research”. (Fonte: El
Correo Gallego).
O selo de Fraga
O servizo postal de Uruguai emitiu unha
serie de selos coa foto do presidente Manuel Fraga, como “Homenaxe do pobo uruguaio á traxectoria pública
do excelentísimo señor don Manuel Fraga Iribarne”. O presidente da Sociedade Filatélica de
Santiago, José Guitián Seijo, posúe unha destas emisións. (Fonte: El Correo Gallego).
Fraude financeiro afecta a Galicia
Un roubo masivo de datos de 40 millóns
de tarxetas de crédito Visa e Mastercard en EEUU afectou a Galicia, polo que algúns bancos e caixas
de aforros advertiron aos seus clientes sobre o bloqueo desas tarxetas para emitir outras novas. (Fonte: La Voz de Galicia).
|
| 21/06/2005 |
|
Galicia-Eleccións
Unha ollada dende o exterior
O proceso electoral galego tivo repercusión
nos medios internacionais. O decisivo voto emigrante foi recalcado en dous diarios arxentinos, “El Clarín”,
“La Nación” e “Página 12”, país onde reside un tercio do voto emigrante. Xornais de Venezuela,
México, Uruguai, Chile, Reino Unido, Francia, Australia e Tailandia tamén reflectiron as eleccións
galegas. (Fonte: El Correo Gallego e Faro
de Vigo).
Diáspora-Eleccións
O PP arxentino non asegura a victoria
Avelino García Melle, representante
do PP e a Xunta na Arxentina, declarou que “a situación é difícil” para obter o escano 38,
pero intentou non demostrar ser demasiado pesimista. “Todo dependerá de cómo voten os emigrantes
de Pontevedra”, boa parte deles residentes no país suramericano. Melle asegurou que en América Latina
“hai unha maioría fraguista” pero recoñeceu que “o PSOE fixo unha campaña moi forte e terá
un repunte”. (Fonte: www.xornal.com).
Unión Europea-Pesca
En perigo os subsidios europeos
O fracaso do cumio do Consello Europeo
en Bruxelas para alcanzar un acordo sobre o gasto comunitario no período 2007-2013 deixa a Galicia nunha
complicada situación e coa posibilidade de perder os fondos europeos para a pesca. Tampouco se coñece
cánto orzamento reservará Bruxelas para a pesca e qué tipo de eixes básicos decidirá. (Fonte: La Voz de Galicia).
|
| 20/06/2005 |
|
Diáspora-Eleccións
O voto exterior decide a presidencia
galega
Por primeira vez e tralos resultados electorais
do 19-X, os mais de 305.000 galegos residentes no exterior terán a facultade de decidir quén será
o próximo presidente da Xunta. O PP de Manuel Fraga obtivo 37 escanos parlamentarios, rozando a maioría
absoluta. A coalición PSOE-BNG sumou 25 e 13 escanos respectivamente. O decisivo escano nº 38 discutese
na provincia de Pontevedra. (Fonte: El Correo
Gallego).
|
| 19/06/2005 |
|
Unión Europea-Fondos Estruturais
Periga o Obxectivo 1 para o 2006
O aprazamento do debate orzamental 2007-2013
no Consello Europeo de Luxemburgo podería traer como consecuencia para Galicia a perda da súa condición
de receptora dos fondos de cohesión en xaneiro de 2006, xa que se tomarán en conta os datos estatísticos
do ano 2003, segundo os que a nosa Comunidade supera o 75% da media de renda comunitaria. Neste sentido, o monto
total da perda financeira se achega aos 2.000 millóns de euros.
(Fonte: El Correo Gallego).
Unión Europea-Innovación
Avance galego en I+D
Segundo datos da oficina estatística
europea Eurostat, Galicia ocupa o lugar nº 13 entre 213 rexións europeas en programas de innovación
e desenvolvemento, cun investimento do 1,26% do PIB. Do mesmo xeito, a Xunta informa que a nosa Comunidade atopase
no cuarto lugar en administracións públicas e na novena posición en sector empresarial. (Fonte: El Correo Gallego).
|
| 18/06/2005 |
|
Unión Europea-Sociedade
Premio Europa en Santiago
A capital galega acollerá en xullo
o quincuaxésimo aniversario do Premio Europa, concibido para a consolidación do espírito común
europeo. Nesta edición intervirán a alcaldesa da cidade alemá de Tübinguen, Briguitte
Russ-Scherer, e da cidade rusa de Kaliningrado, Yuri Savenko. O alcalde santiagués Xosé S. Bugallo
presentou o programa ante o Parlamento europeo en Estrasburgo. Santiago é a única cidade española
que obtivo este premio. (Fonte: El Correo
Gallego).
Bruxelas condecora a A Pobra
A Unión Europea recoñeceu
ao porto de A Pobra co Proxecto Life referente á compatibilidade nos usos náutico, pesqueiro e turístico
desta localidade como receptor importante de investimentos en materia medioambiental. A Pobra foi seleccionada
entre 15 proxectos presentados. (Fonte:
El Correo Gallego).
|
| 17/06/2005 |
|
Diáspora-Eleccións
Cortizo non ve mudanzas no voto emigrante
Miguel Cortizo, embaixador especial para
as relacións coa emigración española en Iberoamérica, declarou a súa percepción
de que o voto emigrante reflectirá unha igualdade política o 19-X, expresando a súa dúbida
de que sexa decisivo nun cambio político en Galicia. Cortizo informou da súa petición ao servizo
de intelixencia arxentino para que vixíe as oficinas de correos a fin de evitar un posible fraude electoral. (Fonte: El Correo Gallego).
Un 55,53% do voto emigrante é galego
de orixe
Fontes do Instituto Nacional de Estatística
informan que só 169.379 dos 305.317 galegos emigrantes con dereito a voto naceron en Galicia, o que supoña
un 55,53% do corpo electoral no exterior. No apartado da participación do voto exterior, esta elevouse con
respecto ás eleccións anteriores, e os primeiros votos en chegar a Galicia viñeron de Suíza,
Francia e Arxentina. (Fonte: La Voz de Galicia).
Téxtil
Unión galaico-lusa para frear
a competencia chinesa
Directores de empresas textís galegas
e portuguesas participaron en Santiago nun seminario onde expresaron a súa intención de estreitar
vencellos para favorecer a internacionalización, sen mover do propio territorio o deseño, I+D e a
xestión, coa finalidade de amortecer a competencia do sector téxtil chinés e asiático.
A proximidade xeográfica é un elemento importante, xa que o 83% do sector téxtil luso se atopa
no norte do país, fronteirizo con Galicia.
(Fonte: El Correo Gallego).
Pesca
Alemaña coñecerá
o mexillón galego
A consellería de Pesca destinará
100.000 euros para a promoción do mexillón galego en Alemaña. (Fonte: El Correo Gallego).
Economía
Xapón sorprendido polo automotriz
galego
Takahiro Okazaki, director xeral de Jetro
(Japan External Trade Organization), amosou ante a Confederación de Empresarios en Vigo o seu interese e
a súa sorpresa pola capacidade do sector automotriz galego, especialmente no tecido industrial de provedores
en torno a PSA Peugeot-Citröen e as instalacións portuarias viguesas. Segundo datos do Instituto de
Comercio Exterior, Galicia mantén un saldo positivo de 12,7 millóns de euros no seu comercio con
Xapón. (Fonte: La Voz de Galicia).
Irmanamento
Cuba presente en Ourense
Cun irmanamento entre Ourense e a Praza
da Revolución da capital cubana, comezou a facerse tradicional a presenza de Cubanía como “caseta”
de preferencia na festividade local do Corpus. A oferta cubana inclúe música, baile, gastronomía
e expresións culturais. (Fonte: La
Voz de Galicia).
Unión Europea-Infraestrutura
Bruxelas pide explicacións polo
Plan Xeral de Cangas
A Comisión Europea pediu ao goberno
estatal que explicara os dous convenios urbanísticos de Aldán e Salgueirón, como parte do
Plan Xeral de Cangas, ante a protesta dos colectivos sociais e ecolóxicos polas presuntas violacións
das directivas comunitarias efectuadas por eses convenios.
(Fonte: La Voz de Galicia).
|
| 16/06/2005 |
|
Sociedade
David Trimble visita Galicia
O ex primeiro ministro de Irlanda do Norte
e Premio Nobel da Paz 1998, David Trimble, participou en Lugo nunha conferencia sobre o terrorismo, na que definiu
as claves do proceso de negociación e a súa diferencia co problema vasco, especialmente nas posicións
entre o IRA e ETA. Trimble, peza clave nos acordos de paz no Ulster, se entrevistou tamén co presidente
Manuel Fraga. (Fonte: El Correo Gallego).
Economía
Enxeño galego para o Tanger City
Center
O consorcio empresarial inmobiliario Fadesa-Anjoca
foi seleccionado pola Société Nationale d´Aménagement de la Baie de Tánger, para
a realización do proxecto Tanger City Center en Marrocos. A superficie consta de 180.000 km2, cun orzamento
de 63 millóns de euros. (Fonte: La
Voz de Galicia).
Pérez Esquivel alarmado pola planta
de Ence
O escritor e Premio Nobel da Paz, Adolfo
Pérez Esquivel, rexeitou o eventual proxecto de Ence na localidade uruguaia de Fray Ventos, explicando que
trala súa viaxe a Galicia, estivo en Marín observando a papeleira de Ence en Madrid, cualificando
a situación de “verdadeiramente preocupante”.
(Fonte: La Voz de Galicia).
Cultura
Compostela, destino turístico
europeo
A capital galega participou na asemblea
xeral do grupo European Cities Tourism, unha rede profesional que desenvolve o fortalecemento do turismo urbano
de 95 destinos turísticos en 30 países europeos. Santiago reúne os requisitos necesarios para
ingresar neste grupo de cidades. (Fonte:
La Voz de Galicia).
Diáspora-eleccións
O PSOE critica os “voos electorais” do
PP
O candidato socialista por Lugo e secretario
de Organización, Ricardo Varela, criticou que o PP utilizara os Boeings R-5 por parte das Aerolíneas
Arxentinas, con voos directos dende Bos Aires a Santiago, para que os seus partidarios voten nas eleccións
autonómicas. (Fonte: La Voz de Galicia).
|
| 15/06/2005 |
|
Eleccións
O PP critica envío de tropas a
Afganistán
Manuel Fraga e Mariano Rajoy criticaron
a decisión tomada polo ministro de Defensa, José Bono, de enviar en xullo o continxente da Brilat
de Pontevedra ao país centroasiático, a que cualifican que foi “ocultada” pola proximidade das eleccións
galegas. Fontes do ministerio de Defensa confirmaron a noticia e a comparecencia de Bono no Parlamento a finais
de xuño. (Fonte: El Correo Gallego).
Unión Europea-Pesca
Aceptada sede da Axencia Pesqueira de
Vigo
Funcionarios da Dirección Xeral
de Pesca da UE, encabezados polo italiano Giorgio Gallizoni e acompañados polo secretario xeral de Pesca
Marítima Juan Carlos Martín Fragueiro, resaltaron as boas instalacións do edificio da Comandancia
Mariña de Vigo, onde funcionará a Axencia Europea de Control Pesqueiro a partir do 2006, e deron
o “visto e prace” para o seu desenvolvemento.
(Fonte: Faro de Vigo).
|
| 14/06/2005 |
|
Defensa
Soldados galegos da OTAN a Afganistán
O ministro de Defensa, José Bono,
confirmou en Pontevedra que un continxente de 500 militares da Brilat en Figueirido partirán ao país
de Asia Central, como parte da misión da OTAN cara aos comicios lexislativos de setembro próximo.
O continxente pertence ás Forzas de Reacción Rápida e xa tivera experiencia en Iraq, Bosnia
e Cosova. (Fonte: El Correo Gallego).
Unión Europea-Pesca
Bruxelas ultima a ubicación da
Axencia Pesqueira
Funcionarios da Dirección Xeral
de Pesca da UE visitaron Vigo para analizar a asentamento da futura Axencia Europea de Control da Pesca, que funcionará
na Comandancia da Mariña, no centro da cidade e ao lado do porto. Os funcionarios estudaron a superficie,
proximidade cos outros edificios administrativos e conexión co aeroporto de Peinador. (Fonte: La Voz de Galicia).
Economía
Misión comercial brasileira
Uns 27 representantes comerciais, empresarios,
deputados e alcaldes do estado brasileiro de Río Grande do Sur visitaron Galicia, nunha misión organizada
pola Cámara de Comercio de Pontevedra, para establecer vencellos económicos. O estado meridional
brasileiro ten dez millóns de habitantes cunha fortaleza do sector automotriz, o turismo e a producción
agrícola. (Fonte: La Voz de Galicia).
|
| 13/06/2005 |
|
Unión Europea-Linguas
O galego non será oficial en Bruxelas
Os embaixadores dos 25 estados da UE decidiron
o uso das linguas cooficiais españolas nas institucións comunitarias, máis isto non supón
un recoñecemento oficial do galego, vasco e catalán como linguas oficiais da Unión Europea. (Fonte: La Voz de Galicia).
Sáhara
Piden testemuña galega no Sáhara
occidental
A delegada do Fronte Polisario en Galicia,
Fatma Mohamed Salem, informou da organización dunha viaxe por parte de xornalistas e responsables políticos
galegos á rexión de Al Aaiún, para constatar “as testemuñas nos territorios ocupados
do Sáhara e o sufrimento dos seus habitantes”. Do mesmo xeito, uns 80 nenos do campamento de refuxiados
de Tinduf pasarán a súas vacacións en Ferrolterra.
(Fonte: www.vieiros.com e La Voz de Galicia).
Diáspora-Eleccións
Sete mil galegos votarán desde
Cuba
Uns 7.000 emigrantes galegos e descendentes
na illa caribeña teñen dereito a voto nas eleccións autonómicas do 19-X. (Fonte: Faro de Vigo).
Portugal
Pontevedra apunta ao mercado portugués
Segundo unha enquisa da Confederación
de Empresarios de Pontevedra, CEP, un 55% das firmas de industrias pontevedresas venden parte da súa producción
ao mercado luso, especialmente dos sectores do metal e automoción, alimentación, madeira e granito. (Fonte: La Voz de Galicia).
|
| 12/06/2005 |
|
Sociedade
Giuliani eloxia a Santiago
O ex alcalde de Nova York Rudolph Giuliani,
célebre pola súa actuación tralos atentados do 11-S de 2001, mantivo un encontro co presidente
Manuel Fraga e participou na V Semana de Tecnoloxía e Negocios. Giuliani destacou o carácter histórico
da capital galega e exaltou tamén a personalidade e as conviccións do falecido ex presidente norteamericano
Ronald Reagan. (Fonte: El Correo Gallego).
Economía
Inditex reforzará o mercado asiático
O plan estratéxico deseñado
pola téxtil coruñesa para os próximos cinco anos estipula a posibilidade de abrir un gran
centro loxístico en Asia, probablemente en Hong Kong, onde xa existe unha tenda de Zara, confiando en abrir
entre 100 e 120 locais en Asia. Do mesmo xeito, o plan preve unha potenciación de Zara como marca global
e que Massimo Dutti, Pull & Bear e Bershka sexan marcas de referencia en Reino Unido, Italia, Francia, Alemaña,
Portugal, Grecia e México. (Fonte:
La Voz de Galicia).
Sociedade
Expedición arqueolóxica
galega a Siria
Un equipo dirixido por Juan Luis Montero,
profesor de Historia Antiga na Facultade de Humanidades de Ferrol, partiu ao país árabe para desenvolver
un proxecto no val do Éufrates, na cidade de Deir ez-Zor, a 150 km. da fronteira con Iraq. O obxectivo é
a busca da cidade de Dur-Yahdum-Lim, fundada no século XIX antes de Cristo por un monarca do reino mesopotámico
de Mari. (Fonte: La Voz de Galicia).
|
| 11/06/2005 |
|
Ecoloxía
Semana Verde internacional
A localidade de Silleda acollerá
o concurso Semana Verde de Galicia, na que se premiará a innovación tecnolóxica no campo,
e que contará coa participación de técnicos de Francia, Alemaña, Dinamarca, Finlandia
e Holanda, ademais doutras comunidades estatais.
(Fonte: El Correo Gallego).
Cultura
Pontevedra na mira do arte europeo
Colette Garraud, experta francesa e autoridade
mundial das artes, exaltou o parque pontevedrés da Illa das Esculturas, emprazado en A Xunqueira, ao catalogalo
como “un dos máis fermosos de Europa”. Garraud está a recoller nun libro aqueles espazos europeos
onde conviven creación e natureza.
(Fonte: La Voz de Galicia).
Inmigración
Caixa Galicia outorga microcréditos
para emprendedores
A entidade bancaria subscribiu un convenio
coa Plataforma polo Emprego de Santiago no que se concederá un crédito de 120.000 euros a un prazo
de seis anos e un tipo máximo do 4%, para os inmigrantes locais que teñan en mente desenvolver proxectos
de autoemprego e a creación de Pemes.
(Fonte: La Voz de Galicia).
|
| 10/06/2005 |
|
Unión Europea-Marítima
Autopista marítima Vigo-Amberes
Bruxelas considera “rendible” a concreción
dunha vía marítima alternativa entre Vigo e a cidade belga de Amberes, coa finalidade de desatascar
as vías terrestres do arco atlántico. A nova ruta funcionaría dúas veces por semana
cunha capacidade para cargar ata 200 plataformas de camión.
(Fonte: La Voz de Galicia).
Portugal
Proxecto Atlante no espazo luso-galaico
O concelleiro de Turismo compostelán,
Francisco Candela, informou que as cidades de Santiago, Lugo, Porto, Guimaraes, Évora e Angra do Heroísmo
nas Azores, formarán parte dunha rede comercial e turística dentro do proxecto europeo Atlante. Candela,
que participou nun seminario en Porto, insistiu tamén na necesidade de crear un órgano de xestión
específico para as cidades históricas e un estatuto fiscal. (Fonte: www.vieiros.com).
Emigración
Galicia e a política migratoria
O secretario xeral da Consellería
de Emigración, Antonio Díaz, exaltou o papel de Galicia como pioneira en experiencias de migración
e pediu unha maior participación da Comunidade nas políticas estatais de migración. Díaz
participou na clausura do seminario América Latina e as Migracións, patrocinado pola OCDE en Santiago,
e que contou coa participación do embaixador especial para a emigración, Miguel Cortizo. (Fonte: El Correo Gallego).
Sociedade
Os vencellos entre Galicia e Irlanda
A ex presidenta irlandesa Mary Robinson
foi recibida polo presidente Manuel Fraga no marco das xornadas “Galicia: Camiños da Concordia”. A Sra.
Robinson destacou os “lazos históricos e actuais” entre ambos pobos e a importancia de Santiago na historia
das cidades europeas. A capital galega recibirá tamén a visita de Jane Seymour, actriz e activista
polos dereitos infantís, e Cherie Blair, esposa do primeiro ministro británico. (Fonte: El Correo Gallego).
|
| 09/06/2005 |
|
Emigración
Pensión completa para galegos
de Suíza
O goberno español asinou un convenio
con Suíza e Liechtenstein sobre o cobro das prestacións totais correspondentes ás cotizacións
dos traballadores españois nese país. Neste sentido, os principais beneficiados son os emigrantes
galegos, que constitúen a maioría dos 34.000 emigrantes españois radicados no país
helvético. (Fonte: El Correo Gallego).
Falece o valedor dos galegos de La Habana
Eliseo Cañit, cubano de ascendencia
galega, representante do centro de Cospeito en La Habana, faleceu na localidade de Cacheiras. Cañit prestou
un gran apoio aos galegos residentes na illa caribeña.
(Fonte: El Correo Gallego).
Pesca
Denuncia presións aos buques galegos
na NAFO
A Asociación de Titulados Náutico
Pesqueiros, Aetinape, denunciou que os mil tripulantes dos 34 buques galegos que faenan en augas da NAFO reciben
un trato hostil por parte das autoridades canadenses durante as inspeccións polos recortes de cotas e o
endurecemento da vixilancia. Pola súa banda, o conselleiro de Pesca, Enrique López Veiga, pediu ao
goberno estatal autorización para empregar os 7,4 millóns de euros dos fondos IFOP concedidos a Galicia,
para a reestruturación da flota galega na NAFO.
(Fonte: El Correo Gallego e La Voz de Galicia).
Cultura
Primeiro dicionario inglés-galego
O Seminario de Lingüística
Informática da Universidade de Vigo preparou o primeiro dicionario inglés-galego e galego-inglés
existente na rede, baixo a dirección Clig. O dicionario está na versión 1.0 e incorpora 5.324
entradas e 7.998 traducións. (Fonte:
www.vieiros.com).
|
| 08/06/2005 |
|
Eixo Atlántico
Consorcio para modernizar a liña
Vigo-Porto
A comisión executiva do Eixo Atlántico
remitiu á ministra de Fomento, Magdalena Álvarez, unha proposición para crear un consorcio
transfronteirizo de Transportes coa finalidade de manter e modernizar a liña ferroviaria Vigo-Porto. Neste
consorcio tamén podería participar o sector privado.
(Fonte: El Correo Gallego e www.vieiros.com).
Economía
Vigo en liña co mercado chinés
Ante o auxe comercial chinés, empresas
do sector marítimo galego están a aproveitar novas rutas comerciais desde Vigo, especialmente no
referente ás descargas de produtos téxtiles, granito en bruto, aceiro para construcción naval
e mobles. O tránsito comercial marítimo con China no 2004 elevouse ás 131.000 toneladas, con
bens procedentes de Shanghai, Hong Kong e Beijing.
(Fonte: La Voz de Galicia).
Sáhara
Ferrol acolle a delegación saharauí
O concello ferrolán recibiu a unha
delegación do goberno saharauí, encabezada polo seu ministro de Xustiza, Hammada Selma, asinando
convenios de cooperación e amizade entre Ferrol e o pobo saharauí. (Fonte: La Voz de Galicia).
Diáspora-Eleccións
Arxentina vive a campaña electoral
galega
As rúas de Bos Aires comezaron
a presentar os carteis de propaganda electoral dos principais partidos políticos galegos. O PP faino coa
figura do presidente Manuel Fraga e unha mensaxe destinada a potenciar a súa relación coa emigración.
Pola súa banda, o PSdG destinou 12.000 axentes electorais e 97.000 carteis coa figura do candidato Emilio
Pérez Touriño acompañado do presidente Zapatero.
(Fonte: El Correo Gallego).
Unión Europea-Fondos Estructurais
Orza cre que Galicia terá fondos
ata o 2009
O conselleiro de Economía, José
Antonio Orza, informou en Vigo nunha xuntanza da Confederación de Empresarios de Pontevedra que con independencia
das negociacións estatais con Bruxelas, existen proxectos de infraestrutura en Galicia que poderían
prorrogar os fondos europeos ata o 2009. Orza tamén cre que no próximo cumio europeo de xuño
non se adoptará un acordo sobre a axenda financeira europea para o período 2007-2013. (Fonte: El Correo Gallego).
|
| 07/06/2005 |
|
Portugal
Temor pola supresión da liña
Vigo-Porto
Nunha entrevista ao diario portugués
“Jornal de Noticias”, o vicepresidente da Xunta e conselleiro de Política Territorial, Alberto Núñez
Feijoo, explicou que a economía de Galicia e o norte de Portugal sufriría graves consecuencias ante
a decisión tomada pola empresa lusa Comboios de Portugal de suprimir a vía férrea entre Vigo
e Porto na súa oferta de verán, a partir do 26 de xuño. O argumento é a perda de pasaxeiros
entre o 2001 e 2004. (Fonte: El Correo Gallego
e Faro de Vigo).
O BNG pide apoio para tradición oral
galaico-lusa
O deputado nacionalista Francisco Rodríguez
pediu á Xunta unha acción coordinada e conxunta co goberno portugués para a defensa da candidatura
oral galaico-portuguesa ante a Unesco, como patrimonio inmaterial da humanidade, por considerar que está
“en perigo de extinción”. (Fonte:
El Correo Gallego).
Eixo Atlántico
Caixanova colaborará cos plans
sociais
A Escola de Negocios e a de Administración
Pública de Caixanova ofrecerá recursos financeiros e asesoramento por valor de 27.000 euros para
a aplicación dun programa de desenvolvemento social na eurorrexión Galicia-norte de Portugal, especialmente
nas áreas de cultura, deporte, xuventude e a divulgación de informes socioeconómicos. (Fonte: El Correo Gallego).
O programa Atlante e o Eixo Atlántico
O alcalde de Porto, Rui Rio, inaugurou
un seminario con representantes das 18 cidades galegas e portuguesas que forman parte do Patrimonio Mundial do
programa europeo Atlante e do Eixo Atlántico, onde se analizaron os proxectos piloto de xestión urbana
e turismo. (Fonte: La Voz de Galicia).
Economía
Compañía viguesa construirá
no Xapón
A mobiliaria urbana e de publicidade exterior
JCDecaux conseguiu o seu segundo contrato no país asiático, para a instalación de marquesiñas
publicitarias na cidade de Nagoya, para os próximos 20 anos.
(Fonte: La Voz de Galicia).
Sociedade
China lidera as demandas de adopcións
Segundo a directora xeral de Familia,
Teresa Rey, as adopcións internacionais crecen dun xeito espectacular en Galicia, xa que só no primeiro
trimestre de 2005 a Xunta recibiu 258 peticións de adopcións, por 367 durante todo o ano 2004, decidindo
a creación dunha xerencia específica para axilizar os trámites. China concentra a maior cantidade
de demandas, 167, seguida de Etiopía, Rusia, Colombia e Bulgaria.
(Fonte: El Correo Gallego).
|
| 06/06/2005 |
|
Economía
Fadesa adquire firma francesa
O grupo inmobiliario coruñés adquiriu
o 70% das accións de Financière Rive Gauche, cun valor de desembolso calculado en 200 millóns
de euros para os próximos tres anos.
(Fonte: La Voz de Galicia).
Unión Europea-Pesca
Axencia viguesa deseñará
plan contra infracións
A futura Axencia de Control de Pesca da UE terá
a responsabilidade de deseñar un plan comunitario para reducir os rexistros de infracións da flota
pesqueira, composta por 89.000 buques e uns 500.000 pescadores. Durante o 2003, as violacións das leis aumentaron
case un 40%. (Fonte: La Voz de Galicia).
Tecnoloxía
Santiago organizará a TechBusiness
Week
A capital galega organizará un cumio internacional
de tecnoloxía, baixo o nome de TechBusiness Week, coa participación do ex alcalde de Nova York, Rudolph
Giuliani. O evento terá como obxectivo a exposición da lexislación informática e o
software libre. (Fonte: www.vieiros.com).
|
| 05/06/2005 |
|
Diáspora-Elecións
O PP e a rede de comunidades no exterior
Ana Pastor, secretaria executiva de Política
Social e Benestar do PP, explicou á comunidade galega en Xenebra o programa político do partido para
as próximas elecións autonómicas. Neste sentido, Pastor informou que o programa inclúe
a creación dunha rede de axencias de cooperación no exterior, para apoiar os servizos socio-asistenciais
e culturais e a preservación da lingua e a historia.
(Fonte: El Correo Gallego).
Unión Europea-Educación
Potenciando o espazo europeo de educación
superior
A Cátedra Bolívar da USC e a Organización
de Economistas da Educación organizaron en Santiago un seminario con representantes da educación
superior de Francia, Portugal, Arxentina, Brasil e Chile, para a potenciación do espazo europeo de educación
superior e a apertura doutro similar para Iberoamérica.
(Fonte: El Correo Gallego).
|
| 04/06/2005 |
|
Unión Europea-Agricultura
Beneficios europeos para Galicia
Segundo o director xeral de Agricultura da UE, José
Manuel Silva, Galicia se beneficiará das medidas de desenvolvemento rural que adoptará Bruxelas no
marco da Política Agraria Común. Neste sentido, Silva destacou o dinamismo do sector agroalimentario
galego. (Fonte: El Correo Gallego).
|
| 03/06/2005 |
|
Diáspora-Elecións
Correos enviará relación
diaria do voto emigrante
Tomando en conta o pedido do PP, a Xunta Electoral Central
solicitou á Oficina de Correos unha relación diaria dos envíos recibidos de votos electorais
inscritos no Centro de Electores Residentes Ausentes, CERA, para as eleccións autonómicas do 19-X.
Estas relacións estarán a disposición dos partidos políticos. (Fonte: El Correo Gallego).
Galegos en Suíza reclaman maior participación
electoral
A comunidade galega no país helvético,
onde segundo o CERA unhas 33.000 persoas están facultadas para votar nas próximas elecións
autonómicas, piden a presenza dos seus representantes no Parlamento galego e a creación dun banco
dos emigrantes. (Fonte: Faro de Vigo).
Diáspora
Galicia nos medios latinoamericanos
A Facultade de Ciencias da Información da USC
e a Xunta asinaron un convenio dotado de 35.000 euros, para a realización dun estudo sobre a imaxe de Galicia
nos medios de comunicación en países con presenza da emigración galega, como Arxentina, Uruguai,
México e Venezuela. O proxecto leva por título “A imaxe de Galicia a través da prensa en América
2005-2006”. (Fonte: La Voz de Galicia).
Economía
Empresa ourensá parte para China
e Xapón
Connova, empresa no campo da enerxía solar, busca
nestes países asiáticos solucións aos problemas de abastecemento das placas solares, que lles
están imposibilitando crecer na medida das súas posibilidades. (Fonte: La Voz de Galicia).
Portugal
Veciños esixen continuidade da
liña Vigo-Porto
A Federación de Asociacións de Veciños
Eduardo Chao esixiu a non supresión da liña férrea entre Vigo e Porto, tal e como planeaban
as autoridades lusas. A presión social impediu a súa aplicación, anunciada pola empresa Comboios
de Portugal. (Fonte: La Voz de Galicia).
Sociedade
“Hai que botalos” se internacionaliza
O documental “Hai que botalos”, crítico coa xestión
gobernamental da Xunta, poderá verse en Bos Aires, Mato Grosso (Brasil), Berlín, Valleing e Tréveris
(Alemaña), Ledeberrg-Gent (Bélxica), Monthey (Suíza) e Londres, como parte da súa campaña
de cara ás elecións autonómicas galegas.
(Fonte: www.vieiros.com).
|
| 02/06/2005 |
|
Diáspora
Quintana reclama dereitos para a emigración
De visita en Uruguai, o candidato do BNG, Anxo Quintana,
reclamou que Galicia debe posuír relacións diplomáticas propias con aqueles países
con forte presenza de emigración galega e que os netos de emigrantes poidan acceder directamente á
nacionalidade española. Quintana se reuniu co presidente Tabaré Vázquez para logo asistir
a un mitin xunto ao senador e líder histórico dos “tupamaros”, Eleuterio Fernández Huidobro. (Fonte: El Correo Gallego).
Turismo
Alemáns interesados na oferta
santiaguesa
Representantes de 22 axencias alemás especializadas
en turismo cultural e relixioso visitaron Santiago invitados por TurGalicia, debido ao interese en potenciar conexións
entre a capital galega e cidades alemás. Segundo un estudo do Observatorio Turístico, o perfil medio
do turista que vista Compostela é de poder adquisitivo medio ou medio-alto, menor de 45 anos, con bacharelato
ou estudos superiores. (Fonte: El Correo
Gallego).
|
| 01/06/2005 |
|
Diáspora-Eleccións
A puxa polo voto emigrante
Segundo a enquisa do CIS, o PP estaría a dous
escanos parlamentarios de renovar a maioría absoluta, sen contar aínda cos votos da emigración,
que semellan decisivos nas elecións autonómicas do 19 de xuño. Ante o pedido do PP de colocar
interventores en Correos para “evitar manipulacións” no voto exterior, o PSdG amosou a súa perplexidade
e acusouno de “saber cómo manipular o voto emigrante”.
(Fonte: El Correo Gallego).
Diáspora
Touriño e Kirchner acordan rede
para as pemes
Como parte da súa xira por Uruguai e Arxentina,
o candidato socialista Emilio Pérez Touriño se reuniu en Bos Aires co presidente Néstor Kirchner,
para adiantar os plans de creación dunha rede de cooperación para as pemes galegas e arxentinas. (Fonte: El Correo Gallego).
Portugal
Analizan problemática dos traballadores
transfronteirizos
O director xeral de Relacións Laborais, Antonio
de La Hera, mantivo en Vigo unha xuntanza co inspector xeral de Traballo de Portugal, Paulo Morgado de Carvalho,
para analizar os problemas que afectan aos traballadores transfronteirizos do sector da construción civil
e doutras áreas así como abordar aspectos relativos á seguridade no traballo, convenios colectivos
e salarios. (Fonte: www.xornal.com).
Cultura
Santiago promóvese en feira de
cinema inglés
A Santiago de Compostela Film Commission promoverá
á capital galega en rodaxe de filmes e produtos audiovisuais na feira da Broadcast Production Show en Londres. (Fonte: La Voz de Galicia).
Pesca
Canadá busca petróleo no
caladoiro da NAFO
Segundo os capitáns galegos que faenan nas augas
da NAFO, os canadenses premen nos pesqueiros estranxeiros que alí faenan, ao consideraren que incomodan
os seus labores de prospeción na busca de petróleo. Neste sentido, Canadá xa tivo incidentes
cun pesqueiro ruso e outro portugués.
(Fonte: Faro de Vigo).
|
