Presenza-Opinión / Outros 
|
||||||||
| Armas sen crise Roberto Mansilla Blanco (igadi.org, 07/06/2010) |
||||||||
|
|
||||||||
O último informe do Instituto Internacional de Estudos para a Paz de Estocolmo (SIPRI) asegura que, pese á crise financeira e económica global, o gasto mundial en armamentos alcanzou unha cifra récord, ao totalizar 1,2 miles de millóns de euros, un aumento do 6% co respecto a 2008 e do 49% co respecto ao 2000. Un 65% dos países aumentaron o seu gasto militar co respecto ao 2009 que, explicado a nivel global, correspondería a un 2,7% do PIB mundial. En principio, este informe non ofrece maiores sorpresas. EEUU, epicentro da crise económica global iniciada en 2008, segue ser o principal comprador mundial de armamentos, con 661 mil millóns de dólares, un 54% do gasto mundial en 2009. China, Francia, Rusia, India e Brasil secundan a Washington no liderado desta lista. Para os imperativos xeopolíticos de Washington, resultaría imprescindible incrementar un gasto en defensa absolutamente comprometido en misións tan incertas como Afganistán e Iraq e ante un contexto de riscos en Oriente Próximo, Asia Central e o sueste asiático. Pola súa banda, e a distancia de EEUU, China emerxe neste contexto como evidente polo de equilibrio militar mundial, toda vez que as suspicacias persuaden a Rusia e Francia a incrementar un gasto que conserve o seu status de potencias militares. Compre igualmente considerar a inclusión nesta lista de grandes compradores mundiais de armamentos a países como Arabia Saudita, Xapón e Alemaña. Resalta neste informe o caso de América Latina, cuxo gasto militar foi calculado pola SIPRI en 34.000 millóns de euros. Brasil lidera esta lista, cun 16% de aumento deste gasto co respecto a 2008, tomando en conta as súas pretensións a longo prazo de constituírse nun gran produtor mundial de armamentos e futura potencia nuclear. Durante 2009, Brasilia confirmou esta pretensión alcanzando importantes acordos militares con socios como Rusia, Francia e Irán, neste último caso máis como avaliador político e diplomático dun novo mapa nuclear global. Outros países como Colombia, Chile, México e Venezuela, destinarán ata o 2015 un gasto en defensa valorado en 235.000 millóns de dólares. Non obstante, compre considerar algúns aspectos relevantes do informe do SIPRI. Un caso particular é o de Venezuela, constantemente acusada de dar curso a unha “carreira de armamentos” en América do Sur, a tenor da súa avanzada cooperación militar desde 2005 con países rivais e incómodos para EEUU, como Rusia e Irán. O SIPRI considera que no 2009, Venezuela foi o único país latinoamericano que diminuíu considerablemente o seu gasto militar, cun 25% menos co respecto a anos anteriores. Nos casos colombiano e mexicano, estímase este gasto ante os conflitos internos derivados da loita contra a insurxencia guerrilleira e o narcotráfico. Pero o contexto sudamericano aduce de importantes retos en materia de seguridade, derivados tamén das tensións na rexión andina entre países como Colombia e Venezuela ou Chile, Perú e Bolivia. Paralelamente, Asia e Oriente Próximo lideran o gasto mundial en defensa por rexións, cunha taxa acelerada do 8,4% no caso asiático. O informe do SIPRI confirma así que a pesar de que o contexto de crise económica debería obrigar aos gobernos e institucións multilaterais a investir na recuperación económica e no en gasto social, a industria de armamentos segue a gozar de boa saúde, proliferando a nivel global mentres multiplica o risco de conflitos e inseguridade. |
||||||||
|
||||||||
|
|
||||||||
|
 Instituto Galego de Análise e Documentación Internacional www.igadi.org ÚLTIMA REVISIÓN: 08/06/2010
|
||||||||
|
||||||||
