Igadi na Rede / Acción exterior

Fronte ao xigantismo chinés, pouca cousa somos. Para darnos unha idea, toda Galicia, en termos demográficos, equivale a unha sexta parte da capital chinesa. Pero contamos con moitas capacidades que poden ser de proveito se as sabemos poñer en valor (e non só as económicas), se as orientamos ben e se non nos desanimamos á primeira de cambio. (Foto: Gran Muralla Chinesa).

Coa visita de investidores privados chineses a Galicia, é probable, sobre todo se a cousa vai adiante, que mude un pouco a distorsionada imaxe dese colectivo no país, a medio camiño sempre entre restaurantes e tendas barateiras. Animados pola política gobernamental de “ir cara fóra” (zou chuqu), cada vez máis empresarios orientais farán a ruta de Occidente con abundantes recursos na súa carteira. As reservas de divisas da China son as maiores do mundo e baten marcas de mes en mes. Unha sociedade estatal creouse recentemente para xestionar ese inmenso capital, a fin de procurarlle unha saída que satisfaga as apetencias estratéxicas do novo coloso, tanto no sectorial coma no xeopolítico, apoiando en tal empeño tanto a empresas públicas como privadas. América Latina, África e outras rexións do mundo ansían verse máis beneficiadas polo maná chinés, habida conta que inviste nos países en vías de desenvolvemento de maneira diferente a como o fan os occidentais, motivados cunha lóxica, a confuciana, substancialmente diferente á nosa. Pode agardar Galicia algún beneficio?

Fronte ao xigantismo chinés, pouca cousa somos. Para darnos unha idea, toda Galicia, en termos demográficos, equivale a unha sexta parte da capital chinesa. Pero contamos con moitas capacidades que poden ser de proveito se as sabemos poñer en valor (e non só as económicas), se as orientamos ben e se non nos desanimamos á primeira de cambio. Sendo serios, tomando iniciativas, apoiándose nos recursos humanos dos que xa dispoñemos no xigante asiático e apoiando aquí os proxectos de diversa natureza relacionados coa China poderiamos tecer unha rede de vínculos e relacións que nos tire do furgón de cola que actualmente ocupamos nas relacións das diferentes Comunidades Autónomas españolas con Pequín.

Galicia xa perdeu moitas oportunidades en China por falta de orientación, de realismo e de preparación adecuadas. Debemos abordar as relacións con Asia, e coa China moi en particular, fixando estratexias que acheguen solidez e non conxunturalidade ás nosas ambicións, sendo conscientes das dificultades e, a maior delas, saber que só quen persevera con ideas claras pode acadar o seu obxectivo. O liderado da Administración, firme pero sedutor, é indispensable. E coidando sempre de non deixarse levar polo espectáculo para que non quede todo noutra versión, esta vez oriental, da famosa película de Berlanga.