Presenza-Opinión / Asia

Un Abe para Xapón Por Xulio Ríos (AGN, 02/10/2006)

Na visión de Shinzo Abe, a volta dun militarismo a peito descoberto semella unha condición sine qua non para que Tokio poida desempeñar un papel máis activo nas relacións internacionais.   Os modos de Shinzo Abe, elixido sucesor de Junichiro Koizumi, presaxian cambios para Xapón. Boa parte da súa atención terá que se centrar nos problemas internos, pero a mudanza máis significativa pode afectar á política exterior. Koizumi deixa unha economía en fase de relanzamento, se ben con problemas estruturais graves como unha débeda pública astronómica (máis do 170% do PIB). Iso permitiralle a Abe concentrarse no que pode ser un dos sinais clave do seu mandato, a redefinición do papel de Xapón en Asia e no mundo. Esa é a “nova nación” que afirma querer construir. Conservador, partidario da guerra contra Iraq, aliado incombustible de Washington, o Xapón de Abe reescribirá a Constitución de 1947 para liquidar o peculiar pacifismo herdado de Hiroshima e Nagasaki que coexiste, paradoxalmente, cun dos orzamentos militares máis importantes do mundo (moi superior ao de China, por exemplo). Na visión de Abe, a volta dun militarismo a peito descoberto semella unha condición sine qua non para que Tokio poida desempeñar un papel máis activo nas relacións internacionais. Shinzo Abe dase un prazo de cinco anos para realizar o seu proxecto. A razón de fondo da viraxe que propón non é outra que a pelexa polo liderado rexional. De América Latina a África, Asia Central ou o Pacífico-Sur, China medra en influencia por todo o mundo. Abe aspira a ese maior protagonismo de Xapón cadrando o círculo, é dicir, mellorando a un tempo as relacións con Beijing. Aínda que hoxe non representa máis da cuarta parte da economía nipona, as potencialidades de China poderían dar a volta á situación nun par de lustros. China é o seu primeiro socio comercial, pero as relacións políticas están seriamente afectadas polas desavinzas. Dende abril de 2005, os contactos ao máximo nivel están suspendidos. A presenza ou non de Abe no santuario Yasukuni dará a medida das súas intencións. Polo momento, a “falta de complexos” polo comportamento pasado na que di querer asentar o seu programa de goberno vale tanto para un roto como para un descosido. China agarda xestos conciliadores, pero ¿estará Abe disposto a amosar arrepentimento polas masacres desatadas por Xapón? Coa mirada posta nas vantaxes económicas, son os grandes empresarios nipóns os que máis están a premer a prol dunha conciliación, sempre difícil nunha Asia máis moderna pero apegada, pese a todo, aos valores tradicionais. Eses que tanto dificultan aquelo, tan necesario sempre, de saber pedir perdón.

Xulio Ríos, director do Igadi.

Instituto Galego de Análise e Documentación Internacional www.igadi.org ÚLTIMA REVISIÓN: 05/10/2006 Fernando Pol

Subscríbete á lista de correo do Igadi e recibe notificación das novas informacións, artigos, documentos, convenios, publicacións, etc, que ofrece o Igadi na súa páxina web Igadi na Rede. Para comprender o Mundo desde aquí ... ... para proxectar a Galicia no contexto internacional.     Apúntate en: http://www.elistas.net/lista/igadi/alta