Presencia-Opinión / Outros

A ONU e o burro apaleado Por Xosé Manuel Figueiras (Vieiros, 11/09/2006)

A ONU é por tanto un mecanismo das potencias internacionais para actuar entre bambalinas, sendo permisivos ou intransixentes con quen lle convén. (Foto: Sede da ONU en Nova York).   Se a ONU naceu en 1945 co obxectivo de aforrar guerras ás futuras xeracións habería que facer balance das súas achegas e clausurar algunhas das plantas das que se compón a súa ostentosa sé en Nova York. Pero a ONU, que oficiosamente naceu para iso, é dicir evitalas guerras, en realidade tiña a outra función latente, a de limpar conciencias escudándose na falla de consenso internacional para declarar con continuas resolucións a manca de efectividade da comunidade dos actores internacionais. O alto ó fogo alcanzado no conflito de Oriente medio non é en realidade froito tampouco da mediación internacional da ONU, senón da ineficacia e do malgasto de forzas de Hezbolà e Israel, xa que ningún conseguiu evitalo fracaso, os dous pelexaron e ningún se creu o vencido. A ONU é por tanto un mecanismo das potencias internacionais para actuar entre bambalinas, sendo permisivos ou intransixentes con quen lle convén. Cando falamos de potencias, temos a ben ser xustos e non podemos deixar de negar a necesidade de pensar na exclusiva potencia que representan os EEUU. Que é no fondo o ventrílocuo que move os membros do boneco sempre e cando non se empantana de máis na súa errada estratexia do “War on Terror”. Iso foi o que aconteceu nos días previos ao alto o fogo no Líbano. Logo de varios fracasos, entre eles o da incontinencia de EEUU e os seus aliados en Iraq, e do vergoñento escándalo do “Petróleo por alimentos”, o organismo internacional ten máis tocada ca nunca a súa imaxe. Non obstante, non deixou de exercerla súa función principal e encuberta: ser o burro apaleado dos estados na orde internacional. Se non houbese unha ONU deste tipo, habería que creala así. A menos que cheguemos a unha orde internacional onde exista unha verdadeira democracia, con separación de poderes e capacidade efectiva de impoñer sancións a todos. Algo hoxe por hoxe, distante.

Xosé Manuel Figueiras, analista do Igadi.

Instituto Galego de Análise e Documentación Internacional www.igadi.org ÚLTIMA REVISIÓN: 11/09/2006 Fernando Pol

Subscríbete á lista de correo do Igadi e recibe notificación das novas informacións, artigos, documentos, convenios, publicacións, etc, que ofrece o Igadi na súa páxina web Igadi na Rede. Para comprender o Mundo desde aquí ... ... para proxectar a Galicia no contexto internacional.   Apúntate en: http://www.elistas.net/lista/igadi/alta