---

Te

		Xulio Ríos, director do Igadi, e Fernando Pérez-Barreiro Nolla, ponente da 1ª Conferencia Anual Plácido Castro.

O Igadi organizou esta 1ª Conferencia Anual “Plácido Castro”, iniciativa con vocación de servir de referencia da reflexión en Galicia sobre os temas internacionais de actualidade, conectando ademais coas ligazóns históricas, obxectivas e subxectivas, que relacionan a nosa terra co exterior.

Deste xeito, o Igadi non soamente reivindica a obra e o pensamento de Plácido Castro (1902-1967), senón que pretende contribuír ó incremento da sensibilización social arredor da necesidade de proxectar a Galicia no mundo con identidade propia, de afondar nos conflictos e tendencias da sociedade contemporánea.

Ninguén mellor que Fernando Pérez-Barreiro Nolla para inaugurar esta nova andaina e honrar a memoria de Plácido Castro.

Ante un público entregado que encheu a Aula de Cultura de Vilagarcía de Arousa, Fernando Pérez-Barreiro pronunciou unha lección maxistral sobre os paralelismos do problema irlandés en tempos de Plácido e os actuais, diseccionando con soltura os aspectos máis salientables do actual proceso, dende os protagonistas ata a nova arquitectura institucional que debe facer irreversible o proceso de paz.

Ata o lugar achegáronse numerosos representantes da vida política e cultural local e galega. Estiveron presentes, entre outros, Xosé Luis Franco Grande, Gonzalo Bouza Brey, o libreiro Xosé Castro Ratón e a concelleira Ramona Castaño.

Un extracto reprodúcese no presente número de Tempo Exterior. O texto íntegro da conferencia publicarase en breve, se ben pode consultarse xa a versión en liña na nosa web (www.iaga.com/igadi).

O Concello de Vilagarcía apoiou en todo momento a proposta e contribuíu de maneira moi digna e eficaz á súa realización. Tanto o alcalde, Javier Gago, como o concelleiro de Cultura, Roberto Araújo, ou o técnico cultural, Xavier Camba, comprometéronse a fondo con esta actividade que terá continuidade en próximos exercicios. Para completar a conferencia, realizouse unha exposición das acuarelas de Plácido Castro, no mesmo Centro Cultural, que foi inaugurada o mesmo día. Os medios de comunicación fixéronse eco extensivamente deste programa.

O Igadi quere agradecerlles a todos a magnífica sensibilidade amosada que garante a continuidade de tan merecido e xustísimo tributo á figura de Plácido Ramón Castro del Río.

---