Tal como estaba previsto, a Asemblea Xeral do Fondo Galego celebrouse en Santiago de Compostela o día 15 de outubro. Na sede da FEGAMP, representantes de máis da metade das entidades asociadas intercambiaron impresións sobre o presente e futuro do Fondo. Entre os asistentes, atopabanse os alcaldes de O Carballiño, Betanzos e Brión. Se a convocatoria viña condicionada por un imperativo estatutario que impón a súa realización nos catro meses seguintes á realización das eleccións locais, na Memoria presentada por Alfredo Novoa, presidente en funcións, expresouse a convicción de que “con independencia do resultado concreto experimentado por cada unha das forzas políticas que concorreron ó recente proceso electoral, as novas corporacións locais serán máis receptivas e comprometeranse máis co Fondo Galego... Existe fundamento para asegurar que soplan ó noso favor os ventos do alargamento da presencia e influencia do Fondo Galego”. Unha apreciación unánimemente compartida por todos os presentes.

A unanimidade presidiu tamén a elección da Comisión Executiva que pilotará o Fondo Galego durante os próximos catro anos. Quedou configurada da seguinte maneira:

Cargo	Titular	Entidade
Presidente	Alfredo Novoa	Concello de Oleiros
Vicepresidente	Ramón Bouzas	Concello de Allariz
Tesoureiro	Xosé María Permuy	Concello de Fene
Secretario	Xulio Ríos	IGADI
Vocal	Conchi Daporta	Concello de A Pobra
Vocal	Lourdes Suárez	Concello de Culleredo
Vocal	Mar Bernal	Concello de Santiago
Vocal	Sofía López Linares	Concello de Quiroga
Vocal	Juan Corral	Deputación de Pontevedra

Na nova Executiva están representadas todas as provincias, todas as sensibilidades políticas presentes no municipalismo galego, concellos de moi diferentes bases demográficas, e, por primeira vez, contará coa presencia dunha deputación provincial.

Por unanimidade, todos os deputados provinciais acordaron a adhesión ó Fondo Galego nunha sesión celebrada o pasado 24 de setembro. Despois de Pontevedra, a de Ourense é a segunda deputación que se incorpora ó Fondo. Moi probablemente tamén o farán en próximas datas as de Lugo e A Coruña.

O próximo día 29 de outubro constituirase oficialmente o “Fons Pitiús de Cooperació”. Será na sede do Consell Insular d’Eivissa i Formentera, na illa balear de Eivissa (Ibiza). O Fons Pitiús ten prevista a súa integración na Confederación de Fondos de Cooperación e Solidariedade. Ao acto de constitución asistirá unha representación do Fondo Galego que nesas datas participará na reunión que a Confederación celebra na illa do Mediterráneo (a anterior tivo lugar o 19 de febreiro en Valencia).

A Asemblea Xeral aprobou tamén o informe económico presentado por Xosé María Permuy, Tesoureiro do Fondo, e a proposta de novas cuotas. Próximamente, todas as entidades asociadas recibirán unha comunicación na que se detallará o importe da cuota mínima inicial establecida para o próximo exercicio, a fin de que se teña en conta no proceso de elaboración dos Orzamentos do 2000. Lémbrase a todos a importancia de estar ó día nos pagos para mellor garantir o adecuado funcionamento do Fondo Galego.

O novo sistema establece unha cuota resultante a partir da suma dunha cuota fixa en función dun baremo de poboación e 2 pta por habitante e ano (segundo os datos do Padrón vixente). No caso das deputacións, diferencianse as de A Coruña e Pontevedra (1.500.000 pta) das de Ourense e Lugo (1.000.000 pta).

Baremo para a determinación da cuota fixa:

Menos de 3.000	30.000 pta + 2 por habitante/ano
3.001 a 5.000	40.000 pta + 2 por habitante/ano
5.001 a 10.000	65.000 pta + 2 por habitante/ano
10.001 a 15.000	85.000 pta + 2 por habitante/ano
15.001 a 20.000	105.000 pta + 2 por habitante/ano
20.001 a 50.000	125.000 pta + 2 por habitante/ano
50.001 a 100.000	145.000 pta + 2 por habitante/ano
100.001 a 300.000	165.000 pta + 2 por habitante/ano
Máis de 300.001	185.000 pta + 2 por habitante/ano

Na Asemblea presentouse un informe preliminar sobre o nivel de execución dos proxectos financiados polo Fondo Galego na convocatoria de 1998. Nun próximo “Infórmate a Fondo” daremos conta en pormenor deste asunto para que todos os asociados coñezan á perfección en que e como se gasta o diñeiro que aportan para realizar as políticas de cooperación e solidariedade.

Na actualidade, a oficina de seguemento de proxectos de Managua (Nicaragua) está a realizar os seus informes, que serán contrastados cos aportados polas ONGs responsables das actuacións. Lembremos que, en 1998, o Fondo Galego financiou dous proxectos en Perú e outro en Guatemala por un importe total de 3.922.565 pta.

A Coruña	Lugo	Ourense	Pontevedra
A Coruña	Mondoñedo	Deputación	Deputación
A Pobra do Caramiñal	O Valadouro	Allariz	A Cañiza
Ares	Quiroga	Montederramo	Baiona
Arteixo	Samos	O Carballiño	Cangas
Betanzos		O Irixo	Gondomar
Brión		Ourense	Moaña
Cabanas		Vilar de Santos	Nigrán
Corcubión			Vigo
Culleredo
Fene
Lousame
Mugardos
Narón
Neda
Noia
Oleiros
Outes
Pontedeume
Porto do Son
Santiago
Valdoviño
Vimianzo